Веќе три месеци четириесетина бубрежно болни што трипати неделно седат на машините за прочистување на крвта велат дека за да дојдат до болницата се снаоѓаат како знаат и умеат
Пациенти што одат на дијализа во Градската општа болница „8 Септември“ во Скопје се оставени без организиран такси-превоз, а не им е исплатен ниту паричниот надоместок што треба да го добиваат за оваа намена, реагираат од Здружението за бубрежно болни „Нефрон“.
Веќе три месеци четириесетина бубрежно болни што трипати неделно седат на машините за прочистување на крвта велат дека за да дојдат до болницата се снаоѓаат како знаат и умеат.
Од Здружението „Нефрон“ посочија дека болницата не го продолжила договорот со такси компанијата, кој истекол во октомври минатата година, па пациентите по дијализа мораат да се снаоѓаат како да дојдат до болницата, но и како да се вратат.
Државата им дава пари да го рефундираат автобускиот билет, но според Душко Ѓоргиев, претседателот на Здружението „Нефрон“ и тие средства доцнат.
„Еднаш стекнато право кога ќе се укине, пациентите реагираат. Навистина ова е проблем за лицата со влошена здравствена состојба кои не можат да користат автобус. Тоа е дополнителен трошок за да се ангажира превоз“,
реече тој.
Поради тоа, неколку пациенти се префрлиле од „8 Септември“ во други центри каде им се обезбедува превоз од дома до дијализното место и назад.
Ѓоргиев посочи и дека според нивните сознанија нема изгледи да се врати такси превозот за пациентите со дијализа што доаѓаат во оваа болница.
Министерот за здраство Арбен Таравари, како што пренесува ТВ Сител, не е запознаен со овој проблем на пациентите на дијализа и рече дека дополнително ќе ја провери ситуацијата.