Според владејачката партија, со законските измени над 27 000 наставници и стручни соработници треба да добијат повисоки плати, а околу 4 700 од нив ќе добијат трајно вработување
По вчерашниот, тензичен почеток на собраниската Комисија за образование, која не ни успеа да се одржи, ВМРО-ДПМНЕ реагира дека СДСМ нема искрена намера за зголемување на платите на наставниците, туку дека сака целосна партизација на образованието.
Од опозициската партија се правдаат дека како опозиција со амандман барале усогласување на платите во јавниот сектор и дека СДСМ вчера исценирале тензии.
„ВМРО-ДПМНЕ преку амандманот побара да се усогласат платите во јавниот сектор со минималната плата и да дојде со коефициентот на сложеност на работните места. Со ова ќе се испочитува и Колективниот договор во образованието, а наставниците и професорите ќе добиеја поголема плата, до 45 илјади денари. Тензиите кои ги исценира СДСМ во комисијата за образование и наука во Собранието се со цел да се протне на мала врата закон за партизација на образовниот кадар во училиштата, а не како што сакат да прикажат- грижа за наставниците. Законот кој СДСМ сака да го изгласа во Собранието не предвидува зголемување на платите на наставниците, туку целосна партизација во образованието“,
велат од ВМРО-ДПМНЕ.
Од СДСМ возвратија дека со деструктивното однесување опозицијата им одмага на наставниците.
„ВМРО-ДПМНЕ цела година блокира измени со кои над 27 000 наставници и стручни соработници ќе добиваат повисоки плати, а околу 4 700 од нив ќе добијат трајно вработување. ВМРО-ДПМНЕ повторно си го покажа лицемерието, насилничката матрица и деструктивното дејствување, покажа дека воопшто не се грижи за наставниците. Зошто на ВМРО-ДПМНЕ им пречат наставниците во основното и среднодното образование, па не бира средства да го спречи покачувањето на платите?“,
прашуваат од СДСМ.
Вчера, седницата на собраниската Комисија за образование почна во атмосфера на раб на поголем инцидент, и повторно не успеа да се отвори расправата по двете точки на дневниот ред, меѓу кои е и Законот за наставници за кој СДСМ подолго време реагира дека е блокиран од опозицијата.
Законот за наставници е пуштен во собраниска процедура уште во јуни минатата година, кога министерка беше Мила Царовска.
Претседателката на Комисијата за образование и наука, Жаклина Лазаревска од СДСМ беше принудена да даде пауза, откако, поради несогласувања околу дневниот ред, до нејзината маса, викајќи и мавтајќи, пристапија присутните опозициски пратеници.
ВМРО-ДПМНЕ инсистираа дека треба да им се дозволат процедурални излагања пред усвојување на дневниот ред.
На дневен ред на вчерашната седница беа измени на Законот за наставници и стручни соработници во основните и во средните училишта и на Законот за Бирото за развој на образованието. И двата закона се во прво читање.