Предложени се парични казни во висина од по 2 илјади евра за три лица што организирале семејни прослави во време на епидемија. Како што информира Основното јавно обвинителство Скопје, првите двајца обвинети, татко и син од Скопје, на 13 септември во дворот на семејната куќа организирале приватен собир – свршувачка, на која присуствувале 30 гости.
Со ова тие постапиле спротивно на прописите и наредбите со кои се определени мерки за спречување на ширењето на коронавирусот ковид-19, согласно кои се забранува одржување масовни собири и настани на отворен и затворен простор.
„Третиот обвинет, како основач и управител на обвинетото правно лице – угостителски објект, на 3 октомври, постапил спротивно на забраната за организирање прослави – свадби во отворениот и затворениот дел од објектот и на Протоколот за отворање и работа на угостителските објекти за исхрана. Тој во објектот дозволил да се организира настан – свадба на која биле присутни околу 90 лица, со што ги довел во опасност животот и здравјето на луѓето. Настанот бил утврден при контрола и надзор од страна на овластени лица од Државниот пазарен инспекторат“,
информира ОЈО-Скопје.
Надлежните јавни обвинители за обвинетите физички лица предложија парични казни од 100 дневни глоби со поединечна вредност на дневната глоба од 20 евра во денарска противвредност или 2 илјади евра, а за обвинетото правно лице, пак, на Основниот кривичен суд му е предложено да изрече парична казна од 300 илјади денари.