Екс претседателот на скопскиот кривичен суд Владимир Панчевски прави увид во предметите за кои обвинителството го товари дека ги делел на подобни судии рачно, а не преку АКМИС системот, објави Телма.
Од 40-те папки кои се донесени како докази, на речиси секое обвинение стои напишано со ракопис и пенкало: „да се распредели кај судија…” и скратен потпос до него.
Меѓу имињата на судиите се споменуваат Ивица Стефановски, Павлина Христова, Дијана Груевска, Весна Димипкова, Ѓоко Ристов, Јани Нича.
Панчевски приговараше дека дел од предметите се нецелосни. Според обвинителството само 5 од нив се неправосилни.
Претходно, пак, сведок од фирмата „Еди Софт“ која го изработила и одржувала софтверот до 2016-та, сведочеше дека постоело копче со кое можело да се врши рачна распределба на предмети со тоа што се впишувало кој уписник ќе оди кај кој судија. Ова било креирано и за итни случаи, а може да се изведе по налог на претседателот на судот.
Панчевски е обвинет за злоупотреба на службената положба и овластување бидејќи во периодот од 2013 до 2016 година, како претседател на Кривичниот суд, рачно доделувал предмети кај судии.