Во својот исказ пред судот Кешишев рече дека Вања и Панче првпат ги видел во објавите на Фејсбук за нивното исчезнување. За грабнувањата на двајцата, кажа дека во овие активности неговата улога главно била да чува стража
„Кога го прашав (Палевски) што е ова, не ми одговори ништо, јас се повлеков во кујната (во седиштето на Десна). Не ми беше јасно за целината на настаните што се случија, немаше одговор од него, доволно ми беше што го видов на слика детето на Фејсбук“, рече обвинетиот Кишешев на денешното рочиште
Со исказ на обвинетиот Влатко Кешишев денеска во Основниот кривичен суд Скопје продолжи судскиот процес за грабнувањата и убиствата на 14-годишната Вања Ѓорчевска и велешанецот Панче Жежовски.
Пред да почне да му поставува прашања, неговиот адвокат Игор Ефремов побара, а судијата дозволи од судницата да биде отстранет првообвинетиот, Љупчо Палевски-Палчо. Образложението на Ефремов беше дека присуството на Палевски би можело да влијае врз вистинитоста на исказот на Кешишев, пренесе МИА.
Како доказ беше наведен случајот со изјавата што во ноември лани Кешишев ја достави до судот, а во која наведе дека првообвинетиот за убиствата нема врска со случајот, а потоа ја негираше со образложение дека бил принуден од Палевски да ја напише додека заедно биле спроведувани во комбе на затворската полиција.
Во својот исказ пред судот Кешишев рече дека Вања и Панче првпат ги видел во објавите на Фејсбук за нивното исчезнување. За грабнувањата на двајцата, кажа дека во овие активности неговата улога главно била да чува стража.
Сите обвинети, како што посочи, ги запознал во „Опера хаус“ во 2021 година кога со сопартиец од Штип зборувале за движењето Трета.
Палевски, како што кажа, го запознал на протест во Скопје, а повеќе се зближиле во „Опера хаус“, каде што, според неговиот исказ, ги запознал Велибор и Боро, најверојатно мислејќи на обвинетите Велибор Манев и Боре Видевски.
Александар Ѓорчевски, таткото на Вања, кој исто така е обвинет во случајот за помагање, како што кажа, првпат го видел во судница.
„Мислев дека не се сериозни за грабнувањето“
Во својот исказ, Кешишев денеска потврди дека присуствувал на копањето на дупката во Велес, каде што беше пронајдено телото на Панче, но рече мислел оти бараат злато. Тоа, како што кажа, било во 2022 година.
„Во недела дојде Велибор во работна униформа и отидовме до местото Рудник. Од кај Катланово, таму имало многу стар пат што бил за Велес и од таму се оди за Рудник. Кога стигнавме таму, извадив копач и лопата и тргнав со него. Во прв момент помислив дека бараме злато бидејќи не ми беше кажано ништо, стигнавме до одредена длабочина, се спакувавме и се вративме назад, без зборови“,
рече тој.
Додаде дека на местото се враќале неколку пати, копале, но не разговарале ништо.
Третиот пат кога копале, Велибор му кажал дека за тоа не треба да знае никој бидејќи, како што рекол, „може и глави да летаат“.
„Ме предупреди да имам до знаење бидејќи дупката била наменета за киднапирање лица. После се вративме во штабот и Вељо му кажа на Палчо до која длабочина сме. Потоа ја завршивме дупката до таа замислена длабочина. Вељо стави капак од штици и се вративме назад во штабот и му кажав на Палчо дека е сѐ во ред и дека има доволно длабочина“,
рече Кешишев.
Тој во исказот наведе и дека ги слушал Манев и Палевски како разговарале за грабнување, но на почетокот, како што кажа, мислел дека не се сериозни во намерата
„Јас го сметав тоа како желба, како фантазија“,
рече тој.
На прашањето кој бил иницијатор, одговори дека не знае точно.
„Прво тој муабет го почнуваше Вељо“,
кажа обвинетиот.
Прашан дали знае каде живее обвинетиот Велибор Манев и дали има одено во неговиот дом, Кешишев одговори потврдно. Кажа дека претходно таму одел за партиски активности и на слава, а последен пат кај Манев дома бил пред грабнувањето на Панче.
Неговиот адвокат го праша да го опише ранецот што го извадил од совозачкото седиште на возилото „рено кангу“ со кое пристигнале во домот на Манев, а кое се гледа на снимките презентирани на претходните рочишта кога се изведуваа материјални докази.
„Темносина, тегет, внатре немам отворено, не знам што има бидејќи беше на Палчо, тој си го носеше со него, а вообичаен не претурам по туѓи работи. Ранецот и кесата со ‘мотороли’ ги однесовме во гаражата, каде што пиевме кафе и се договараа што како да биде“,
рече тој.
Околу тоа што разговарале таа вечер Кешишев одговори дека се зборувало за Панче, каде што живее и како да се пријде до него, до куќата. Во домот на Велибор рече се задржале половина час, а потоа со вокитоки тргнале кон куќата на Жежовски. Него, како што кажа, го оставиле за го земе „кангуто“ и да чека долу на патот додека другите да се вратат.
За убиството на Панче дознав во партијата, тврди Кешишев
На прашањето која била целта за грабнувањето на Жежовски, тој одговори дека тоа било неговото возило, кое потоа требало да се искористи за друга намена.
Утрото кога го грабнале Панче, тој кажа дека бил заедно со Палевски во „кангуто“.
„Ме остави мене на паркинг покрај пругата. Вељо имаше ‘моторола’ со која му кажуваше на Палчо дека патот е чист,
рече тој.
Кешишев во исказот кажа оти разбрал дека Панче е грабнат и убиен дури откако се вратиле во партијата.
На прашањето што се случува во деновите по грабнувањето на Панче и пред грабнувањето на Вања, рече дека останал со Палчо.
„Кога излезе сликата на Фејсбук од Панче, јас и Палчо бевме сами, мислев да одам за Штип некој ден, Палчо ми кажа дека му требам, да останам таму“,
рече тој.
Тој одговори негативно на прашањето дали некогаш со Палевски одел во обиколка каде што живее Вања.
„Немам одено во обиколка. Само знаев дека се работи за уцена, за пари, поим немав за кои лица се работи. Не знаев колку пари и кој треба да ги земе. Еднаш му кажав на Палчо, мислев дека тоа беше пред да се случи тоа со Панче, дека не се потребни такви работи, тој ми кажа, може и самиот да потврди, да ќутам, да седам на страна и да не се мешам и јас немав право на збор“,
кажа Кешишев.
Тап истрел
Според неговиот исказ, даден денеска во судницата, сите договори и планови ги правеле Палевски и Велибор Манев.
„Договараа што како да биде, тој муабет се правеше подолго време и поверував кога се случи тоа“,
рече тој.
Прашан каква била неговата улога при грабнувањето на Вања, одговори дека му било кажано да ја помести колата до влезот, „до скалите, да го отворам гепекот и да седнам на совозачко (седиште)“.
„Утрото кога ја грабнавме Вања тргнавме од штабот со ‘кангуто’ до Радишани – Палчо, Вељо, јас, Боре, каде што беше паркиран ‘ситроенот’. Таму ме остави Палчо и ние тројцата влеговме во ‘ситроенот’. Тој тргна пред нас со ‘моторола’, а Вељо го возеше „ситроенот“ до местото“,
рече Кешишев.
Потоа, кажа што се случувало откако пристигнале во Бразда, каде била убиена Вања и каде беше пронајдено нејзиното тело закопано во дупка. Посочи дека тој останал подолу.
„Чекав таму цело време, стоеја, разговараа, потоа се свртев, гледав дека работат, копаат, следниот пат кога се свртев, Палчо во раката држеше пиштол, тоа јасно се гледа, пак се свртев спрема патот да не наиде некој, потоа слушнав истрел, пукање, тапо“,
рече Кешишев.
Дополни дека откако завршиле, Палчо ги избришал лопатите и копачот со WD40 (средство за чистење и заштита од коризија) и ги ставил во ‘реното кангу’.
„Влеговме зад Боре и јас, а по нас со ‘ситроенот’ тргна Велибор, излеговме на асфалтот кај местото Бразда и на едно 500 метри ми кажа лопатите и копачот да ги фрлам во една дупка покрај патот. Јас ги фрлив и продолживме спрема местото каде што требаше да се запали ‘ситроенот’“,
рече тој.
По палењето на „ситроенот“, како што додаде, се вратиле во штабот и по кратко време Велибор и Боре тргнале за Велес, а Палчо останал.
„Кога го прашав што е ова, не ми одговори ништо, јас се повлеков во кујната. Не ми беше јасно за целината на настаните што се случија, немаше одговор од него, доволно ми беше што го видов на слика детето на Фејсбук“,
рече тој, додавајќи „сите бевме замислени, секој на свој начин, не разговаравме ништо“.
Прашан дали знае чиј е пиштолот и „мотролите“ што се користеле, одговори:
„Не можам да тврдам, што сум слушнал овде дека бил на Боре“.
На прашањето каде се наоѓаат пиштолот и „мотролите“, одговори дека мисли оти се било во ранецот што Палевски секогаш го носел со себе.
На крајот од испитувањето од неговиот адвокат, на прашањето дали на местото „Дупки“ слушнал истрел исто како на местото Бразда, одговори „слушав малку, ама беше подруг звукот”.
На претходните две рочишта исказ пред судот, даде обвинетиот Боре Видевски кој ги негираше поврзаност со убиствата на Вања и Панче.
Претходно, беше сослушан обвинетиот Велибор Манев кој во детали ги образложи грабнувањата на девојчето и велешанецот, а како координатор на сите активности и извршител на убиствата го посочи обвинетиот Љупчо Палевски.
Според најавеното, по сослушувањето на Кешишев, треба да сведочат таткото на Вања, Александар Ѓорчевски и на крај првообвинетиот Палевски.
Според обвинението, Палевски, Видевски, Манев, Кешишов и Ѓорчевски, се обвинети дека заедно испланирале грабнување на 14-годишната Вања со цел да присилат член на нејзиното потесно семејство да даде парични средства за откуп. Грабнувањето на оштетениот Панче Жежовски во Велес, пак, според обвинението, било со намера да го присилат да им го даде сопственото возило „ситроен“ за да го користат за грабнување на детето во Скопје.
Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.