Меѓувладината конференција за пристапните преговори на Северна Македонија со ЕУ треба да се одржи без одлагање, смета словенечкиот претседател Борут Пахор.
Тој на денешната средба со претседателот Стево Пендаровски истакна дека ова е шансата што ЕУ не смее да ја пропушти.
Пахор јасно кажа дека конференцијата не смее да се одложи зашто тоа може да доведе до инерција на целиот процес кој потоа би траел долго време, а тоа, напомена, ќе ги загрози интересите на Северна Македонија, регионот и на ЕУ.
„Не можам да кажам колку е тоа битно. Мојата посета тука не е случајна, не е случајно ниту времето на посетата. Го избрав зашто сакам, како една од 27-те држави на ЕУ, да нагласам дека сега е вистинската шанса да не се одложува меѓувладината конференција на Северна Македонија со Европската комисија. Разбирам дека некои соседни држави имаат колебања, но сакам отворено и јасно да кажам дека сега е вистинско време за солидарност меѓу членките на ЕУ“,
рече Пахор.
Претседателот Пендаровски кусо додаде дека до овој момент не постои официјална позиција на Бугарија со која се бара одложување на првата меѓувладина конференција.
„Сакам да го видам крајот на преговарачкиот процес кој се одвива во ЕУ. Не би ја коментирал почетната преговарачка позиција на Бугарија. Имаме намера периодов да го отвориме комуникацискиот канал со Софија. Би почекал следните недела – две како ќе се одвива преговарачкиот процес во Брисел. Има сигнали дека може да се најде компромис за неколку точки. Апсолутно сум убеден дека нашите бугарски пријатели нема да си дозволат да бидеме блокирани во декември“,
напомена Пендаровски.
По заедничката прес-конференција е предвидено Пендаровски и Пахор да положат венци на гробот на Гоце Делчев во црквата „Св. Спас“. Пахор потоа ќе се сретне со претседателот на Собранието, Талат Џафери, а ќе има и обраќање пред пратениците во законодавниот дом.
За попладне е планирана средба со премиерот Зоран Заев.
Словенечкиот претседател, кој ќе престојува во земјава денеска и утре, на платото пред „Вила Водно“ беше официјално пречекан од претседателот Пендаровски со највисоки државни и воени почести.