Министерот изрази надеж дека пратениците денеска гласале „против“ поради скратената постапка на предложениот закон и додаде дека набрзо народните избраници уште еднаш ќе имаат можност да се произнесат за законот. Сепак, рече дека исходот од денешното гласање го гледа како одмазда кон него и кон неговата партија – Алијанса за Албанците поради неподдршката за измените на Кривичниот законик
Откако мнозинство пратеници во Собранието одлучија да не го поддржат донесувањето на законот за амнестија по скратена постапка, министерот за правда Кренар Лога, кој е предлагач на законот, најави дека законското решение повторно ќе го достави во парламентот, но овој пат по редовна постапка.
Министерот изрази надеж дека пратениците гласале „против“ поради скратената постапка на предложениот закон и додаде дека набрзо народните избраници уште еднаш ќе имаат можност да се произнесат за законот.
Сепак, рече дека исходот од денешното гласање го гледа како одмазда кон него и кон неговата партија – Алијанса за Албанците поради неподдршката за измените на Кривичниот законик.
„Денеска Македонија е понеправедна држава од вчера, за жал оваа неподдршка за предлог-законот за амнестија ја гледам како одмазда за измените на Кривичниот законик кон мене и мојата политичка партија“,
изјави Лога на денешната прес-конференција во Собранието.
Прашан дали излегува од Владата и дали постои криза во владината коалиција, Лога негира:
„Нема никаква криза. Значи, како што кажав – Македонија денеска е понеправедна држава од вчера и продолжуваме понатаму. Јас пак ќе ја повторам постапката, но во редовна процедура. Ако сакаат дежа ву, пак ќе ја имаат таа можност уште еднаш да гласаат за оваа работа. Ако се донесуваат преку ноќ закони за големи риби, тогаш јас имам кажано од прв ден дека сум на страната на граѓаните“,
додаде Лога.
Дека денешното гласање за законот за амнестија не треба да влијае на владината коалиција е став и на премиерот Димитар Ковачевски. Одговарајќи на новинарски прашања тој денеска кажа дека пратениците имаат суверено право да гласаат во свое име, во име на граѓаните во однос на законските решенија кои се нудат.
Мнозинството пратеници во Собранието денеска не дaдоа зелено светло за предлогот на Владата за донесување на законот за амнестија по скратена постапка. „Против“ потребата од донесување на законот по скратена постапка гласаа 66 пратеници, 15 беа „за“, а тројца гласаа „воздржано“.
По ваквиот исход од гласањето, лидерот на ВМРО-ДПМНЕ, Христијан Мицкоски, праша дали има некакво недоразбирање помеѓу пратениците и раководството на СДСМ, со оглед на тоа што, како што рече, предлог-законот поминал на владина седница, а сега пратениците на СДСМ велат дека нема да го гласаат.