По настанот, јавен обвинител извршил увид и издал наредби за обдукција на телото на починатиот, за прибирање траги од местото на настанот кои ќе бидат предмет на вештачење
Основното јавно обвинителство Битола поднесе кривична пријава против дедото кој вчера го уби поранешниот зет за ќерка за кривично дело – убиство од член 123 став 1 од Кривичниот законик, информираат од Обвинителството.
„Осомничениот, на 21 февруари, со умисла го лишил од живот неговиот зет за ќерка. Според првичните сознанија, сега починатиот, вооружен со долг нож, започнал да удира со клоци по дрвената влезна врата од домот на осомничениот и ја скршил. Штом влегол во домот, во претсобјето бил пречекан од осомничениот кој пукал директно во него со пиштол ‘бајкал’ што го поседувал со дозвола. Го застрелал со два последователни истрели, па оштетениот веднаш паднал и починал на самото место“,
се вели во соопштението на Обвинителството.
По настанот, јавен обвинител извршил увид и издал наредби за обдукција на телото на починатиот, за прибирање траги од местото на настанот кои ќе бидат предмет на вештачење, како и за обезбедување снимки од видеонадзор на објектот.
Надлежниот јавен обвинител до судијата на претходна постапка од Основниот суд во Битола доставил и предлог за определување мерка притвор за осомниченото лице оценувајќи дека постои опасност да се даде во бегство или да влијае врз сведоците, додаваат од Обвинителството.