Отворање на Уставот ќе има, порача заменик претседателот на Владата задолжен за европски прашања, Бојан Маричиќ вечерва во дебатниот магазин „Клик плус“ на ТВ21.
„Ние ќе ги дадеме сите аргументи зошто опозицијата треба да гласа и ќе им дадеме доволно простор да може да се качат на овој брод. Ќе дадеме можност да имаат доверба дека овој процес навистина е почнат и дека самите тие ќе го закочат доколку не гласаат“,
вели Маричиќ.
Според него предвремени парламентарни избори нема да има.
„Предвремени избори не се потребни и јас мислам дека ќе успееме промените во Уставот да ги направиме до редовните“,
нагласи Маричиќ.
Маричиќ истакна дека повеќето граѓани се за Европската Унија и дека ќе се најде сила да се надминат овие проблеми кои што ги имало и во други држави.
„Имало и предрасуди дека нема да можеме да печеме ракија, дека нема да можеме да правиме ајвар. Сето тоа се предрасуди и пропаганда кои што треба да ги надминеме затоа што денеска и во Хрватска и во Словенија овие активности се дозволени, па живеат многу понапредно и позадоволно од она што било пред 10 или 15 години, пред да влезат во ЕУ“,
додаде Маричиќ.