Од Канео е отстранета нелегална кафеана која со бетонски ѕид беше навлезена во Охридското Езеро, објави советникот во Владата, Христијан Ѓорѓиевски.
„Продолжува ослободувањето на охридското крајбрежје! Од Канео отстранета нелегална кафеана, навлезена во езеро со бетонски ѕид, под самата црква. Просторот им е вратен на охриѓани!“,
напиша Ѓорѓиевски на Твитер.
Ова е продолжение на акцијата за отстранување на урбана опрема и бесправни градби во Охрид кои се надвор од опфатот на Генералниот урбанистички план.
Мината недела во посета на Охрид беше и министерот за дијаспора, кој е и претседател на Националната комисија за УНЕСКО, Едмонд Адеми, кој заедно со охридскиот градоначалник Костадин Георгиевски ја потенцираше важноста на исполнување на препораките на УНЕСКО и имплементација на Планот за управување со природното и културното наследство на Охридскиот Регион.
„Дел од сопственици на објекти на крајбрежниот појас од населбата Свети Стефан до потегот на крајбрежјето кај Градиште веќе започнаа самостојно да ги отстрануваат поставените нелегални објекти на плажите. Упатуваме апел и до останатите сопственици да постапат по дадените препораки. Процесот на отстранување на урбаната опрема и бесправните градби од крајбрежниот појас на Охридското Езеро, според планираното ќе продолжи по завршување на активностите на уредување и ќе трае се до конечно расчистување на крајбрежјето“,
посочи тогаш Георгиевски.