Денешната седница на собраниската Комисија за политички систем и односи меѓу заедниците на која требаше да почне амандманската расправа за предлог-измените на Изборниот законик е откажана бидејќи не се преведени сите амандмани.
Претседателот на Комисијата, Александар Кирацовски, рече дека досега се преведени и ставени во електронскиот систем 3.734 амандмани од вкупно поднесените 5.899.
Ќе се чека службите до крајот на следната недела да ја завршат работата, по што ќе закаже седница за разгледување на амандманите на двата предлога за измени на Изборниот законик кои се однесуваат на една изборна единица и отворени листи и родова рамноправност.
Во меѓувреме, на 25 декември ќе се одржи јавна расправа за менување на Изборниот законик за да се презентираат аргументите и да се разубедат оние што се против.
Кирацовски денеска уште еднаш ги повика подносителите на илјадниците амандмани ВМРО-ДПМНЕ и ДУИ да се премислат и да ги повлечат за да не се блокира процесот.
Пратеничката група на ДУИ ги образложува илјадниците поднесени амандмани со забелешката дека процесот за измени на Изборниот законик се води еднострано и оти менување на правилата на игра пред избори е опасен преседан со кој би се соочила политичката сцена во земјава. Сметаат дека изборните правила на игра мора да се донесат консензуално во согласност со сите политички партии.
Ист е ставот и во ВМРО-ДПМНЕ.
„Не може нов Изборен законик да се носи без согласност на најголемите релевантни политички партии и да се носи еден или два месеца пред избори. Без разлика колку сегашниот или можниот иден изборен модел може да бидат подобри или помалку добри од она што денес го имаме како изборна пракса“, велат од опозициската партија.
СДСМ поддржува измени со кои се предвидуваат една изборна единица и отворени листи и бара од ВМРО-ДПМНЕ и ДУИ да ги повлечат амандманите и да се отвори дебата.
Според предлагачите за една изборна единица и отворени листи, актуелната поделба на шест изборни единици е пречка за фер изборен натпревар зашто ги фаворизира големите политички партии на сметка на помалите и на евентуалните независни листи. Помалите партии сметаат дека воведувањето една изборна единица без изборен праг и отворени листи ќе обезбеди политички плурализам и демократизација.