Дел од потпорниот ѕид на улицата „Белградска“, која поминува над Клиничкиот центар „Мајка Тереза“ над Клиниката за детски болести, се урна на 10 јуни годинава. Како што уште тогаш изјави првиот човек на ЦУК, Стојанче Ангелов, пријава за лошата состојба на ѕидот имало уште во ноември 2022 година
Министерството за здравство треба да започне со изградба на ограден, потпорен ѕид кај Детската клиника како привремено решение, откако во јуни годинава дел од него се сруши.
Ова како заклучок било донесено на денешната координативна средба на Центарот за управување со кризи (ЦУК) со претставници од Министерството за здравство, Град Скопје, Општина Центар, МВР и Инспекцискиот совет, а во однос на состојбата на потпорниот ѕид во кругот на Клиниката за детски болести во Скопје.
Градот Скопје, како што посочија од ЦУК, треба да изработи нов сообраќаен проект во координација со Секторот за внатрешни работи Скопје , со што би се редуцирал сообраќајот на тешки товарни возила на оваа локација.
Додека Министерството за здравство работи на изградба на потпорниот ѕид, како што информираат од ЦУК, Град Скопје дополнително ќе треба да ги пресади дрвјата на трасата на улицата „Белградска“, каде што се наоѓа Детската клиника. Еден од заклучоците од денешната средба е ЦУК да побара извештај од Министерството за животна средина и просторно планирање за намената и состојбата на руиниран канал, каналски систем, на улицата.
„За трајно, долгорочно решавање на проблемот потребно е Град Скопје во координација со останатите надлежни институции да изготви нова хидролошка студија и студија за заштита на подземните води на падините на Водно, врз основа на што би се преземале трајни мерки за изградба на нова улица со потребната каналска мрежа и нејзино асфалтирање“,
велат од ЦУК, информирајќи за заклучоците од денешната координативна средба.
Дел од потпорниот ѕид на улицата „Белградска“, која поминува над Клиничкиот центар „Мајка Тереза“ над Клиниката за детски болести, се урна на 10 јуни годинава. Како што уште тогаш изјави првиот човек на ЦУК, Стојанче Ангелов, пријава за лошата состојба на ѕидот имало уште во ноември 2022 година.