Владите на Шпанија, Словенија, Ирска и Норвешка објавија заедничка изјава во која ја осудуваат забраната на Израел и предупредија дека таа претставува „многу сериозен“ преседан за работата на ОН и на сите организации од мултилатералниот систем
Светските лидери и меѓународните хуманитарни организации изразуваат загриженост околу испораката на помош во Газа, откако израелскиот парламент (Кнесетот) вчера изгласа закон со кој ја забрани работата на Агенцијата на Обединетите нации за помош на палестинските бегалци (УНРВА).
Критикувајќи ја одлуката на израелскиот парламент, генералниот секретар на Обединетите нации, Антонио Гутереш вчера вечер порача: „Нема друга алтернатива за УНРВА“, пренесуваат светските агенции.
Според него, со ваквата одлука на Агенцијата на ОН ѝ се забранува да спроведува било каква активност во Израел, вклучително и во областите во анектираниот Источен Ерусалим, Појасот Газа и окупираниот Западен Брег, пишува британски „Гардијан“.
Гутереш го повика Израел да постапува согласно обврските кои произлегуваат од Повелбата на ОН и меѓународното право, посочувајќи дека националното законодавство не може да ги промени тие обврски.
Новиот израелски закон, кој треба да стапи на сила во следните 90 дена, се очекува да доведе до затворање на штабот на УНРВА во Источен Ерусалим, што ќе доведе до блокада на испораката на хуманитарна помош во Газа преку преминот „Рафах“, на границата со Египет. Законот забранува издавање дозволи од страна на Израел за влез и работа на персоналот на УНРВА и координација со израелската војска околу испораката на пратките хуманитарна помош.
„Овој закон ризикува да ја направи суштинската работа на УНРВА за Палестинците невозможна, загрозувајќи го целиот меѓународен хуманитарен одговор во Газа и испораката на суштинската медицинска и образовна помош на Западниот Брег“,
изјави британскиот премиер Кир Стармер, изразувајќи сериозна загриженост за законот на Кнесетот.
Тој порача дека хуманитарната ситуација во Газа е едноставно неприфатлива и оти е потребен итен прекин на огнот, ослободување на заложниците и значително зголемување на помошта за Појасот.
Германскиот комесар за политика за човекови права и хуманитарна помош, Луиз Амцберг, предупреди дека овој потег „ќе ја направи невозможна работата на УНРВА во Газа, Западниот Брег и Источен Ерусалим и ќе ја загрози виталната хуманитарна помош за милиони луѓе“.
Реагираше и австралиската министерка за надворешни работи Пени Вонг која побара продолжување на испораката на хуманитарната помош во регионот.
„УНРВА работи на спасување животи. Австралија се противи на одлуката на израелскиот Кнесет сериозно да ја ограничи работата на УНРВА“,
напиша Вонг на социјалните мрежи, повикувајќи го Израел да ги почитува обврзувачките одлуки на меѓународниот суд на правдата и да овозможи проток на основни услуги и хуманитарна помош во Газа.
UNRWA does life-saving work.
— Senator Penny Wong (@SenatorWong) October 28, 2024
Australia opposes the Israeli Knesset’s decision to severely restrict UNRWA’s work.
On Sunday, Australia joined Canada, France, Germany, Japan, South Korea and the UK to urge Israel’s Knesset not to proceed with this legislation.
Владите на Шпанија, Словенија, Ирска и Норвешка објавија заедничка изјава во која ја осудуваат забраната на Израел и предупредија дека таа претставува „многу сериозен“ преседан за работата на ОН и на сите организации од мултилатералниот систем.
Портпаролот на американскиот Стејт департмент Метју Милер, зборувајќи пред новинарите во Вашингтон пред израелските пратеници да гласаат за законот, рече дека администрацијата на САД е „длабоко загрижена“ и дека УНРВА има „незаменлива“ улога во обезбедувањето помош за Појасот Газа.
Хуманитарните групи Оксфам, Акшн Ејд и Австралискиот совет за меѓународен развој (АКФИД), исто така, го осудија потегот на Израел. Според Наоми Брукс од АКФИД, вакцинацијата против детска парализа во Газа би била речиси невозможна без помошта на УНРВА.
„Овој предлог-закон ја поткопува меѓународната хуманитарна операција во Газа, каде што милиони се соочуваат со дехидрација, глад и болести“,
рече таа.
Инаку, Агенцијата на ОН обезбедува помош, школување, здравствена заштита и помош на палестинските бегалци во регионот повеќе од седум децении. Повеќе од 1,9 милиони Палестинци се раселени, а Појасот Газа се соочува со голем недостиг на храна, вода и лекови.
Во врска со носењето на законот, израелскиот премиер Бенјамин Нетанјаху вчера изјави дека работниците на УНРВА, кои се вклучени во терористички активности против Израел, мора да сносат одговорност.
„Бидејќи избегнувањето на хуманитарна криза е исто така суштинско, одржливата хуманитарна помош мора да остане достапна во Газа сега и во иднина. Во 90-те дена пред да стапи на сила оваа легислатива, и потоа, ние сме подготвени да работиме со нашите меѓународни партнери за да обезбедиме Израел да продолжи да ја олеснува хуманитарната помош за цивилите во Газа на начин што не ја загрозува безбедноста на Израел“,
рече тој.
Претходно, Обединетите нации започнаа истрага во врска со израелските тврдења дека вработени во Агенцијата соработувале со Хамас, поради што деветмина работници беа отпуштени од работа.
Портпаролот на американскиот Стејт департмент, Метју Милер, коментирајќи ја забраната што ја наметнува новиот израелски закон, рече дека таа може „да има импликации според американскиот закон. Американскиот закон го спречува Вашингтон да дава воена помош за земјите кои ја ограничуваат американската хуманитарна помош, иако тоа законодавство ретко се спроведува.