Според извори од државната компанија, членовите на комисијата која требало да го спроведе тестирањето не сакале да учествуваат во ваквиот избор на кандидати и поднеле оставки
Еден од тројцата директори на македонска навигација (М-НАВ), Љубе Стаменковски и раководителите на одделот за информатички и надзорни технологии, на одделот за надзорни системи, на одделот за навигациски системи, на електро-енергетски системи и на одделението за воздухопловна техника Охрид, поднесоа оставки од раководните функции, незадоволни од изборот на кадри кои се вработени во секторот за техника во оваа институција.
Извори за ТВ Телма велат дека кандидатите кои се примени на работа не ги имале потребните квалификации, а од друга страна не го поминале тестирањето.
Според извори од државната компанија, членовите на комисијата која требало да го спроведе тестирањето не сакале да учествуваат во ваквиот избор на кандидати и поднеле оставки.
Извршниот директор Фахрудин Хамиди изјавил дека законите не се прекршени и дека кандидатите се примени на работа според истите услови како и претходните огласи.
За потсетување, штрајкот на контролорите на летање при М-НАВ кој беше најавен за 25 декември и 1 јануари, е откажан, соопшти претседателот на Синдикатот на контролори на летање (ССКЛ), Александар Тасевски.
„Видовме дека со нашите активности доведуваме до тоа изборот на неопходниот оперативен кадар да биде пролонгиран и да не може да се изврши доколку продолжиме да инсистираме на тие 10 работни денови за конкурсот. И понатаму стоиме на тоа дека треба да отпаднат тие двајца несуштински кандидати за вработување. Имавме опција или целосно да се откажат сите вработувања или да прифатиме, односно да ги ‘проголтаме’ кнедлите за оваа неисправност од страна на директорите кои веројатно оделе на таа карта намерно да играат за да немаме големи шанси за маневрирање“,
изјави претседателот на Синдикатот на контролори на летање.