Иако собранискиот Деловник предвидува можност премиерот да ја образложи оставката пред пратениците, Заев го известил Џафери дека нема да ја искористи таа можност
Оставката на премиерот Зоран Заев што ја поднесе вчера до Собранието треба да се најде на денешната собраниска пленарна седница која претходно беше закажана за пратенички прашања.
Заев вчера преку писмо го информира претседателот на Собранието Талат Џафери и пратениците дека поднесува оставка од функцијата премиер и наведува дека нема усно да ја образложи во Собранието.
Во писмото вели дека одлуката ја донел како логичен чекор што произлегува од исходот на локалните избори и како израз на одговорност за изборниот резултат. Според него, резултатите од последните избори, иако беа локални, имаат принципиелна и политичка тежина за политичкиот момент во кој се наоѓа државата.
„Во такви услови, за мене лично и како премиер, поради политиките во кои верувам, поради демократските и европските вредности во кои верувам, би било политички неодговорно и неоправдано да продолжам да ја водам Владата на евроатлантскиот пат“ ,
вели Заев во оставката.
Од денеска почнуваат да течат роковите од 10 дена во кои шефот на државата треба да му го даде мандатот за формирање влада на новиот мандатар и од 20 дена во кои тој би требало да ги состави списокот на министри и програмата на владата и да ги испрати во Собранието.
Според тоа, новата влада би можела да биде избрана во парламентот до крајот на следниот месец, доколку се чекаат последните рокови, вклучително со терминот во кој треба да се одржи собраниската седница. Доколку процесот оди побрзо и се скратат роковите, изборот на новата Влада би можел да заврши и кон средината на јануари, со оглед на тоа што коалициските партнери веќе ги имаат договорено повеќето детали.
Заев вчера присуствуваше на редовното годишно обраќање на претседателот Стево Пендаровски пред Собранието. Неколку часа подоцна неговата оставка стигна во парламентот.
Ноќта на 31 октомври, по вториот круг од локалните избори, Заев најави оставка и од лидерската позиција СДСМ и од премиерското место. Прво ја ефектуираше оставката на партиската функција, така што СДСМ неодамна доби нов лидер – Димитар Ковачевски, кој наскоро ќе го наследи Заев и на премиерското место.