Османи најави дека ОБСЕ ќе продолжи да работи со сите земји учеснички за да се обезбеди помош и најави уште поголем ангажман од страна на Организацијата и поддршка од фондовите на ОБСЕ
Поддршката од ОБСЕ за Република Турција ќе продолжи сè додека турскиот народ целосно не закрепне од трагедијата што го погоди, му порачал денеска претседавачот со ОБСЕ, министерот за надворешни работи Бујар Османи, на турскиот колега Мевлут Чавушоглу. Османи, заедно со генералната секретарка на ОБСЕ, Хелга Шмид, ја посети Турција која беше погодена од серија разорни земјотреси во кои животот го загубија десетици илјади луѓе, а стотици илјади се повредени.
„Мојата посета во Турција доаѓа во период на голема тага. Оваа катастрофа предизвика незамисливо страдање и болка за илјадници семејства и заедници низ целата земја. Се надеваме дека повредените наскоро ќе закрепнат и нашите мисли и молитви се со вас. Уште еднаш, во името на ОБСЕ, им изразувам сочувство на семејствата на жртвите кои ги загубија животите во оваа трагедија“,
рече Османи.
Османи во своето обраќање ја нагласи важноста на колективната одговорност за континуирано давање помош и поддршка на погодените од трагедијата.
„Би сакал да ја искористам оваа можност за да им се заблагодарам на сите земји учеснички на ОБСЕ за нивната поддршка кон Турција во овие тешки времиња. Но, исто така, сакам да оддадам почит и кон секој еден граѓанин на оваа планета кој го дал својот каков бил придонес, без разлика колку е мал, бидејќи придонел во хуманитарните напори“,
порача Османи.
Во својство на претседавач со ОБСЕ, тој испрати порака дека треба да размислуваме и да работиме за иднината, истакнувајќи дека тоа ќе бара колективна акција во наредните години. Османи најави дека ОБСЕ ќе продолжи да работи со сите земји-учеснички за да се обезбеди помош, најавувајќи уште поголем ангажман од страна на Организацијата и поддршка од фондовите на ОБСЕ.
„Турција изрази загриженост за отсуството на конкретни механизми од страна на ОБСЕ кога станува збор за одговор на катастрофи. Би сакал да ве уверам дека сериозно ги сфаќаме овие грижи и дека работиме на нивно решавање. Ни треба уште поголем ангажман од целата меѓународна заедница, вклучително и од ОБСЕ. Моето присуство овде денес, како Претседавач со ОБСЕ, заедно со генералната секретарка Хелга Шмид, е доказ за нашата одлучност во овој поглед“,
истакна Османи.
Османи посетата ја искористи и да ја искаже благодарноста за граѓаните на нашата земја кои организираа бројни хуманитарни акции за поддршка на турскиот народ.
„Би сакал да ја искористам можност и да ја изразам мојата благодарност до луѓето од мојата земја, Северна Македонија. Тие покажаа огромна солидарност и отворени срца веднаш да пружат помош за турскиот народ. Владата и институциите испратија хуманитарна помош, специјални единици на терен и финансиска поддршка. Блиските односи меѓу Северна Македонија и Турција се изградени врз основа на силна доверба и взаемно почитување“,
истакна министерот за надворешни работи.