Во однос на забелешките од Брисел за измените на Крвичниот законик, Османи нагласи дека и денеска на средбите објаснил оти тие промени се во рамки на усогласувањето со европската легислатива
Навистина сум оптимист дека сега влегуваме во нова фаза, при што топката е на наша страна и верувам дека граѓаните ќе ја разберат важноста на моментот дека судбината на државите се одлучува на одредени моменти, а ова е еден од тие моменти кога се одредува насоката на движење на државата, кога сме во пресвртна точка дали ќе влеземе во период на изолација или во период на забрзана инетеграција во ЕУ. Сега одговорноста е на секој од нас, на секој политичар, секој пратник и секој граѓанин, изјави за МИА министерот за надворешни работи Бујар Османи, кој е во работна посета на Брисел.
„Доминантниот став е дека има несекојдневно поместување на позицијата на ЕУ за потребата од проширување. За жал требаше да се случи војна, за да ја потикне таа свест, но таа свест е тука. Ставот е дека не знаеме колку ќе трае таа отворена врата и затоа е важно секој да го препознае моментот“,
истакна Османи.
Тој потенцира дека неговата денешна посета на главниот град на Белгија имала три дела, при што основна тема бил приемот по повод 8 Септември, што се организира секоја година низ дипломатската мрежа, а годинава тоа се прави во Брисел и во Вашингтон.
„Втората тема беше НАТО и средбата со генералниот секретар Јенс Столтенберг, со кого разменивме инфромации во однос на руската агресија на Украина и улогата на Северна Македонија во поддршката на земјата, а преку мојата улога како претседавач на ОБСЕ разговаравме и за соработката и разменивме инфромации меѓу ОБСЕ и НАТО“,
додаде Османи.
Не помалку важна била и третата тема на средбите во Европскиот совет и презентацајата во тинк-тенк организацијата Центар за европски политики, каде што Османи го презентирал владиниот концепт – повеќе интерграција пред членство, како начин на задржување на кредибилитетот на Европската Унија преку бенефити што ќе ги почувствуваат граѓаните пред самото челнство во ЕУ.
„Тоа не е некаков алтернативен аранжаман и сме сè погласни од моментот кога Шарл Мишел рече дека 2030 е годината кога стануваме земја членка. Сега прашањето е како до 2030? Нам ни е многу важно до 2030 година полека да се интегрираме на европскиот пазар, да имаме пристап до фондовите на ЕУ и да седнеме на масата каде што се креираат политики“,
изјави Османи.
Во однос на забелешките од Брисел за измените на Крвичниот законик, Османи нагласи дека и денеска на средбите објаснил оти тие промени се во рамки на усогласувањето со европската легислатива.
„Сега, според објаснување на сите експерти, со измените Законот станува пофлексибилен и подинамичен и се става фокус на незаконски стекнатиот имот, но и дава можност судиите побрзо да ги завршат предметите. Сето тоа ќе доведе до една нова динамика во судството која ја очекуваат граѓаните. Знам дека заради контекстот има конспиративни теории дека ова е поврзано со уставните измени. Но, не е поврзано со нив, туку е прашање кое се провлекува низ годините и ќе овозможи динамичност, флексибилност и брзи одлуки во судството, токму во интерес на владеењето на правото“,
потенцира Османи.
Портпаролката на Европската комисија, Ана Писинеро, вчера во изјава за ТВ 24 изрази жалење поради недостигот на консултации со Европската комисија пред усвојувањето на измените во Кривичниот законик, како и за употребата на европското знаменце во парламентарната процедура.
Измените на Кривичниот законик со кои, меѓу другото, беа опфатени и членовите кои се однесуваат на злоупотреба на службената положба и овластување (353) и злосторничко здружување (354) од утре стапуваат во сила.