Одлуката за преговори со ЕУ не ни е подарена, таа е заслужена, порача вицепремиерот за европски прашања Бујар Османи на денешната прес-конференција откако ЕУ постигна договор за почеток на пристапните преговори.
Кога го почнавме овој пат пред три години, рече Османи, не бевме целосно убедени дека овој момент ќе дојде после 20 години од процесот на стабилизација во земјава и 15 години во чекалната.
„Денешната одлука да ѝ дадат зелено светло на Северна Македонија не претставува никаков подарок ниту чиста политичка одлука. Напротив, таа е признание за напредокот, за реформите, за успехот во создавањето на добрососедските односи, за внатрешната општествена кохезија. Затоа одлуката е донесена без никакви дополнителни услови за земјата. Со тоа Европската комисија доби одврзани раце да почне да ја формира преговарачката рамка со која доаѓа и првата меѓувладина конференција. Свесни сме дека справувањето со кризата со коронавирусот ја окупира јавноста, но верувајте дека битката против коронавирусот ќе ја добиеме и добро е да знаеме дека во блиска иднина нè чекаат предизвици“,
порача Османи.
Тој рече дека тоа што ја очекува земјата во преговорите треба да биде мотив и да ни помогне во овие моменти со коронавирусот кога се чувствуваме загрозени.
*Поврзани вести:
Вархеји: ЕУ постигна договор за почеток на преговори, честитки до Северна Македонија и Албанија
Спасовски: Ќе работиме посветено за брзо да се завршат преговорите за членство во ЕУ
Заев: Донесена е одлука, почнуваме преговори за влез во ЕУ
Шекеринска: Бидна почеток на преговори со Европската Унија, честитки до сите наши граѓани!