За зачувување на регионалната, европската, но и трансатлантската безбедност се налага и потребата од засилен ангажман и присуство на НАТО и САД на нашите простори, порачал Османи на работната вечера што ја организираше Нуланд
Пораки дека зачленувањето на Северна Македонија и земјите од Западен Балкан во ЕУ е значајно за да имаме стабилен регион кој ќе биде отпорен во актуелниот несигурен геополитички контекст, испрати шефот на дипломатијата на традиционалната трансатлантска работна вечерa во Њујорк.
Станува збор за настан кој го организираше потсекретарката за политички прашања во Стејт департментот, Викторија Нуланд, на маргините на 77. Генерално собрание на Обединетите нации (ОН).
Во своето обраќање, како што соопштија од МНР, Османи ја нагласил потребата од забрзување на евроатлантските интеграции на земјите од регионот на Западен Балкан, како значаен влог во регионалната, но и европската стабилност.
„Проширувањето на ЕУ со земјите од Западен Балкан е особено значајно во насока на обезбедување стабилен и отпорен регион во актуелниот несигурен геополитички контекст. Воедно, со цел зачувување на регионалната, европската, но и трансатлантската безбедност се налага и потребата од засилен ангажман и присуство на НАТО и САД на нашите простори“,
рекол Османи.
Шефот на дипломатијата го поздравил единството во НАТО во однос на поддршката на Украина и ги презентирал низата чекори и мерки што ги преземала Северна Македонија како членка на Алијансата за одговор на руската агресија.
Во фокусот на целата трансатлантска работна вечер била токму руската агресија врз Украина односно актуелните предизвици со кои се соочува трансатлантската заедница, но се зборувало и за енергетската криза, зголемување на отпорноста на демократиите и приоритетите за дејствување во трансатлантските односи.