Во своето прво официјално обраќање од изборната кампања, кандидатот за шеф на државата од редовите на ДУИ порача дека С Македонија се наоѓа на крстопат. Едниот пат, како што рече, води кон светла, европска иднина, а другиот води кон изолација, бесперспективност и нејасност. Од таа причина, како што рече, ова не се обични избори, туку народен референдум кој ќе ја определи иднината на државата
Ја почнувам оваа мисија од седиштето на НАТО со надеж дека дека ќе ја завршам како претседател во седиштето на Европската Унија, порача на денешната прес-конференција од пред вила „Водно“ претседателскиот кандидат на ДУИ, Бујар Османи, на првиот ден од кампањата за изборите за шеф на државата.
Порача дека стартот на кампањата се случува веднаш по неговото доаѓање од седиштето на НАТО во Брисел:
„И тоа во еден посебен ден – четврти ден, четврти месец, 2024 година на денот на основањето на НАТО и на четиригодишнината од членството на С Македонија во НАТО. Јас го почнувам овој победнички караван под бројот четири како симболика дека сме на вистинскиот пат. Го почнуваме овој победнички караван патувајќи на четирите страни од државата, слушајќи ги барањата и очекувањата на граѓаните и, се разбира, претставувајќи ги моите планови како во следните пет години оваа земја ќе стане членка на ЕУ, а граѓаните ќе имаат светла и безбедна иднина.“
Во своето прво официјално обраќање од изборната кампања, Османи порача дека С Македонија се наоѓа на крстопат. Едниот пат, како што рече, води кон светла, европска иднина, а другиот води кон изолација, бесперспективност и нејасност. Од таа причина, како што рече, ова не се обични избори, туку народен референдум кој ќе ја определи иднината на државата.
„Имајќи ја можноста и привилегијата која ми беше дадена од граѓаните да бидам дел од најважните интегративни процеси во оваа држава, сметам дека го имам искуството, ги имам контактите, го имам кредибилитетот во центрите на одлучување и ја имам посветеноста да го заокружам сонот на секое семејство, на секој граѓанин, за светла, безбедна и европска иднина“,
додаде кандидатот за шеф на државата од ДУИ.
Османи додаде дека во оваа трка зад него стои најголемиот мултиетнички „Европски фронт“ – коалиција од девет партии – чијашто цел, како што кажа, на овој крстопат е да го задржи евроатлантскиот курс, да ја задржи меѓуетничката хармонија во државата, да ги зачува меѓусоседските односи и да го заврши евроинтегративниот пат за С Македонија да стане членка во Европската Унија до 2030 година.
Седумтемина претседателски кандидати од денеска и официјално ја стартуваат кампањата за првиот круг од изборите за шеф на државата. Почетокот на кампањата е на точно 20 дена од гласачкиот ден, 24 април, а ќе трае до полноќ на 22 април, по што започнува дводневниот изборен молк.