Информацијата за посетата на семејството Бектеши на својот фејсбук-профил ја сподели Османи, кој во објавата го опишува својот сопартиец како „вистински пријател кој е лажно обвинет и уште понеправедно одвоен од своето семејство“
Крешник е силен, храбар и пред сè праведен човек – затоа очекуваме многу брзо да се врати кај нас, вели поранешниот министер за надворешни работи Бујар Османи, кој денеска заедно со потпретседателот и портпарол на Демократската унија за интеграција (ДУИ), Арбер Адеми, го посетиле семејството на ексминистерот за економија Крешник Бектеши, кој во моментоv е во притвор и е меѓу осомничените за трагедијата во Кочани.
Информацијата за посетата на семејството Бектеши на својот фејсбук-профил ја сподели Османи, кој во објавата го опишува својот сопартиец како „вистински пријател кој е лажно обвинет и уште понеправедно одвоен од своето семејство“.
„Заедно со Валбона, Албина и Арбер, и со нашите семејства, за Бајрам бевме кај Илка, Хана и Трим Бектеши, како и родителите на Крешник. Бајрам е свет празник кој симболизира милост, единство, поддршка, великодушност и благодарност. Но пред сè, Бајрам нè потсетува на нашата издржливост да се соочиме со предизвиците на животот, учејќи нè на трпение и зрелост“,
пишува Османи.
Во објавата тој додава дека Бајрам е вистинскиот ден да покажат „оти не само Крешник, туку целото семејство Бектеши ја има нашата поддршка“.
Откако на поранешниот министер за економија Крешник Бектеши му беше определен 30-дневен притвор, на Фејсбук се огласи и неговата сопруга Илка Каба Бектеши, која напиша дека апсењето на ексминистерот е оттргнување на вниманието од вистинските виновници.
„Едно треба да бидете сигурни, дека народот не може да биде дефокусиран од вистинските виновници, последната лиценца што Крешник ја издал е во 2021 година, објектот работи со лиценца од 2012 година“,
напиша Илка Каба Бектеши на својот фејсбук-профил.
Во објавата таа додаде дека тоа што од политичарите трагедијата се користи за политичко пазарење е надвор од секаков вид човечка норма.