Државата е стабилна, нема ризик од некаква дестабилизација, но сме внимателни кон намерата на овие хибридни напади кои имаат за цел да создадат немир и недоверба меѓу граѓаните, а потоа да се надоврзат евентуално и политички партии и други прашања, порача министерот за андворешни работи Бујар Османи на брифинг со новинарите. Според него не станува збор за тинејџерска игра, бидејќи слични закани имало и во земјите од регионот, па затоа била побарана и помош од НАТО. Останува МВР да се координира со партнерските служби во регионот и да побара помош за да се откријат сторителите кои очигледно не се во Македонија, рече Османи.
„Ние бевме во комуникација со МВР во смисла како да пристапиме во однос на барање на поддршка и ние на МВР им кажавме дека НАТО не е адресата за конкретно ова прашање, затоа што ова бара полициска истрага со цел да се најдат сторителите. НАТО нема такви механизми,“
рече Османи.
Османи појасни дека НАТО дава поддршка повеќе за дијагностицирање на слабостите на системот предлагајќи среднорочни и долгорочни планови како да системот ви стане поотпорен на хибридни закани и напади но нема мисија којашто би направила истрага и форензика.
„Меѓутоа проценивме дека поради фактот дека ова очигледно ги надминува нашите граници. Јас тоа го потврдив за време на мојата посета во Подгорица кога на прес-конференцијата со премиерот, кој истовремено е и министер за надворешни работи доминираа истите прашања што ни ги поставувате ние на нас. Зошто има толку дојави за бомби во школите во Црна Гора и тие решиле дури да преминат на онлајн заради голем број на дојави и немаат капацитет да ги проверат сите. Тоа веќе ни даде сигнал дека ова не е некоја игра на тинејџери, ова мора да е нешто, има регионален контекст бидејќи се две земји – членки на НАТО, очигледно мора да е нешто сериозно“,
објаснува Османи.
Во однос на повиците од Германија до своите државјани да бидат внимателни во Северна Македонија поради дојавите за бомби, за Османи се легитимни.
„Вчера имавме дојави за бомби во хотел, и ние ќе постапивме исто,“
вели министерот.