„Доколку уставните измени се направат денес, ние слободно можеме во Законот за спроведување на Уставот да вметнеме клаузула со која се вели, доколку во наредните пет години Бугарија продолжува да ја спречува Северна Македонија за работи кои немаат врска со Европската Унија, парламентот да има за право да ги суспендира уставните измени, но тие да стапат во сила сега“, рече Османи
Поранешниот шеф на дипломатијата Бујар Османи, во емисијата „Дејли клик“ на ТВ 21 излезе со решение како да се одблокира евроинтегративниот процес на Македонија, односно како да се направат уставните измени кои Европската Унија ги бара од нас, а притоа државата да се осигури дека во иднина Бугарија нема да ни поставува нови услови, нешто на што инсистира владата на Христијан Мицкоски.
Османи предлага уставните измени да се реализираат преку вметнување на клаузула во законот за спроведување на Уставот, доколку Бугарија во наредните пет години продолжува да ја опструира Македонија на патот кон Европската Унија со други услови, тогаш парламентот да има право да ги суспендира.
„Ние треба да ги реализираме уставните измени. Еве, јас одам еден чекор понапред, доколку уставните измени се направат денес, ние слободно можеме во законот за спроведување на Уставот да вметнеме клаузула со која се вели, доколку во наредните пет години Бугарија продолжува да ја спречува Северна Македонија за работи кои немаат врска со Европската Унија, парламентот да има за право да ги суспендира уставните измени, но тие да стапат на сила сега“,
рече Османи.
Тој оцени дека не спроведувањето на уставните измени ја враќа дебатата со Бугарија кај јазикот, идентитетот и историјата.
„Колку сакаат нека зборуваат дека Албанците, во овој случај јас, сум ги оштетил македонските интереси. Јас во Бугарија ја дефокусирав дебатата за јазикот и идентитетот и сум ја довел на дебата за малцинствата, за 3 500 Бугари тука и сум убеден дека ова беше најдоброто решение за државата, за македонскиот народ и за сите други. Неспроведувањето на уставните измени повторно нè враќа на дебата за идентитетот, јазикот и историјата“,
посочи поранешниот министер за надворешни работи.
Од Владата денеска, преку портпаролката Марија Митева, експресно го отфрлија предлогот на Османи.
„Ја видовме изјавата на поранешниот шеф на дипломатијата којшто со години беше на чело на таа позиција и цениме дека најмалку има кредибилитет да зборува за оваа тема од причина што се сомневаме во нивните намери при давањето предлози и решенија за состојбата во која се наоѓаме по однос на ова прашање“,
рече Митева на прес-конференција, одговарајќи на новинарски прашања.
Унгарското претседателство со Европската Унија пред три дена соопшти дека Комитетот на постојани претставници на владите на земјите членки на ЕУ (Корепер) го усвоил заедничкиот став на Унијата за отворање на првиот кластер во преговорите за членство на Албанија, со што се овозможи денеска во Луксембург да се одржи меѓувладина конференција ЕУ-Албанија.
Со ова, практично, Албанија се одвои на својот европски пат од Северна Македонија. Досега двете држави се движеа заедно во пакет кон полноправно членство во Унијата, но поради неусвојувањето на уставните измени, Македонија не може да ги продолжи преговорите.
Премиерот Христијан Мицкоски во повеќе наврати го повторува ставот, негов и на Владата која ја предводи, дека нема ништо против вметнување на Бугарите во Уставот, но инсистира уставните измени да важат откако Македонија ќе стане полноправна членка на Унијата, со цел на патот кон Унијата да не се соочиме со идни можни блокади и условувања од страна на Бугарија.
Тој најави дека ваквиот предлог ќе го презентира во Брисел и дека ќе бара поддршка тој да се реализира. Мицкоски вчера во Берлин, во рамките на „Берлинскиот процес“ остварил средба со канцеларoт Олаф Шолц и со други високи официјални лица и премиери на земји членки на ЕУ, кои, како што изјави, ја изразиле огромна поддршка за Македонија во евроинтегративниот процес. Ова, како што нагласи премиерот, го направило поголем оптимист дека конечно ќе бидеме дел од Унијата. Но, не кажа дали го презентирал својот предлог за одложени уставни измени и каков бил евентуалниот фидбек во однос на истиот.
„Во делот на евроинтегративните процеси уште еднаш го потенцирав ставот на Владата, дека премногу имаме и како народ и како држава во изминативе децении дадено и дека заслужуваме шанса да ги почнеме процесите безусловно, дека заслужуваме да ги отвораме поглавјата и да ги покажеме нашите капацитети за тоа колку бргу ќе ги затвораме. Останувам подготвен да разговарам со било кого за да изнајдеме решение коешто ќе значи на долг рок вистинско решение со јасен крај – членство во ЕУ“,
истакна премиерот.
Мануел Сарацин, специјалниот германски пратеник за Западен Балкан, денеска на онлајн брифинг со новинарите од регионот, потврди дека на некои од состаноците вчера во Берлин во рамките на самитот за Берлинскиот процес се дискутирало за Македонија и нагласи оти е јасно дека во одлуката на Европскиот совет стои што треба да направи државата за да продолжи со преговорите.
Министерот за европски прашања Орхан Муртезани, во интервју за „360 степени“ пред две недели, откри дека на средбите кои заедно со премиерот Христијан Мицкоски неодамна ги имале во Брисел со високи претставници на Европската Унија, меѓу кои и со претседателот на Европскиот совет, Шарл Мишел, се разговарало за идејата за уставни измени (за внесување на Бугарите) со одложено дејство. Како што кажа, во Брисел нема голема надеж за оваа идеја, но таа не се отфрлала анблок.
„Беше разговарано за предлогот на нашата влада за носење на уставните измени со одложено дејство, за што, морам да бидам искрен, не дека има некоја голема надеж од страна на институциите во Брисел дека таков предлог би поминал, меѓутоа не се отфрла анблок. Има одредена доза оптимизам кој ние ќе треба да го конкретизираме. Мислам дека Владата има добра основа кога вели дека логиката во уставните измени треба да е слична со онаа што е направена кога влеговме во НАТО по промената на името. Односно дека во фазите на промената на Уставот треба да има уште еден дополнителен амандман што ќе гласи дека содржината ќе се материјализира, ќе влезе во сила, откако Бугарија ќе го ратификува договорот за приклучување на земјава кон Европската Унија“,
рече Муртезани.