Измените и дополнувањата на Законот по скратена постапка беа најавени за денешната собраниска седница
По барање на опозицијата, на денешната собраниска седница не се најдоа измените и дополнувањата на Законот за заштита на населението од заразни болести, по скратена постапка, кои се однесуваат на нови мерки за заштита од коронавирусот.
Од ВМРО-ДПМНЕ потврдуваат дека побарале да ги разгледаат подетално предлозите и да дадат свои предлози.
Се очекува Собранието да расправа за Законот на следната собраниска седница, на 27 октомври, кога се очекува на работа да се вратат и двајцата пратеници од мнозинството позитивни на ковид-19, Лазе Танески и Исмаил Јахоски.
На собраниската интернет-страница во предлог-дневниот ред за денешната 18. седница како последна точка беше ставен и овој закон, но на седницата немаше образложение зошто тој денеска не се става на дневен ред.
Препораките за носење маски на отворено, ограничување на групирање по 22 часот и ограничување на семејните собири се законските измени што ги предлага Владата која, пак, денеска на седница треба да разгледува и други мерки, како економските оператори да работат до 23 часот, јавниот превоз да работи со половина од капацитетот, а државната и јавната администрација да работат во смени, со ротација или онлајн.
Доколку и тие не дадат резултат, следно е, според министерот за здравство Венко Филипче, воведување полициски час.
Поврзана вест:
Повеќе контроли или поголемо игнорирање: Секојдневно расте бројот на казни за неносење маски