Со оперската претстава во изведба на Националната опера и балет во Софија официјално беше отворена новата сезона во Софиската опера
Министерството за култура и туризам преку соопштение до јавноста извести дека вчерашната изведба на оперската претстава „Набуко“ од Џузепе Верди од страна на македонската Национална опера и балет била проследена со силни аплаузи од публиката во Софиската национална опера и балет.
Оттаму велат дека министерот Зоран Љутков, кој ја проследи претставата заедно со неговиот бугарски колега Најден Тодоров, изразил задоволство од соработката помеѓу двете земји на културен план.
„Културата е делот каде што се надминуваат сите проблеми, затоа ние ќе продолжиме да ја развиваме соработката во културата и во туризмот, сектори кои може да донесат и економски придобивки за двете земји“,
велат од Министерството.
Изведбата ја проследија и претседателката Гордана Сиљановска-Давкова и министерот за надворешни работи и надворешна трговија Тимчо Муцунски.
Претставата „Набуко“ беше изведена под диригентската палка на маестро Бисера Чадловска, со Марјан Јовановски во главната улога.
Претходно, Сиљановска-Давкова оствари средба со бугарскиот претседател Румен Радев, по која изјави дека двете земји ќе трагаат по заедничко решение без никој да се чувствува навреден, и додаде дека со Радев се согласиле и нашата земја да ги добие „научените бугарски лекции“ за да не ги повторува истите грешки во евроинтегративниот процес.
„Ќе трагаме по компромис и заедничко решение без никој да се чувствува навреден или повреден и без никој да мисли дека бил заборавен“,
рече Сиљановска-Давкова.
Од кабинетот на Радев, пак, соопштија дека Бугарија очекува искажаната желба за дијалог и разбирање од страна на претседателката Гордана Сиљановска-Давкова да стане конзистентна политика на македонската Влада.