Освен на Онкологија, од вчера нови директори има и на Клиниките за токсикологија и за неврологија. Новиот министер за здравство Арбен Таравари на овие функции ги назначи Андон Чибишев и Фатмир Меџити
Игор Стојковски е назначен за директор на Универзитетската клиника за радиотерапија и онкологија во Скопје.
Доктор Стојковски е шеф на отсек на Одделението за малигни тумори на ЦНС, коскени тумор и кожа на Клиниката за онкологија. На оваа функција е од 2013 година, а претходно работел како шеф на отсек на Одделението за малигни тумори на главата и на вратот.
Од 1997 до 1998 година работи како лекар – волонтер на Универзитетската клиника за радиотерапија и онкологија во Скопје, а од 2000 до 2004 година како лекар на специјализација на оваа клиника. Од 2018 до 2023 година бил доцент на Катедрата за онкологија со радиотерапија при Медицинскиот факултет во Скопје ,а од 2023 година е вонреден професор на овој факултет.
Информацијата дека е поставен за директор Стојковски ја потврдил за МИА.
Освен на Онкологија, од вчера нови директори има и на Клиниките за токсикологија и неврологија. Новиот министер за здравство Арбен Таравари на овие функции ги назначи Андон Чибишев и Фатмир Меџити.
Назначувањето на новите директори доаѓа откако министерот Таравари еден ден по преземањето на функцијата ги смени организациските директори на десетина клиники во рамки на Клиничкиот центар „Мајка Тереза“.
Меѓу сменетите организациски директори, како што потврди Таравари, е и Бесија Иљази од Клиниката за токсикологија, која изминатиот период беше во фокусот на јавноста во врска со спорни вработувања. И покрај утврдените неправилности од страна на Државниот санитарен и здравствен инспекторат (ДСЗИ), претходникот на Таравари, односно министерот за здравство во техничката влада Илир Демири, не ја разреши. Со Токсикологија изминатиот период раководеше само Иљази откако Демири на 14 мај го разреши медицинскиот директор д-р Данил Петровски.
Министерот најавува и дека наскоро ќе биде предложен закон со кој ќе се укине позицијата економски или организациски директор на клиниките.
Овие два дена, како што информирале од Министерството за здравство за МИА, разрешени се економските директори на Универзитетската клиника за токсикологија; Универзитетскиот стоматолошки клинички центар „Свети Пантелејмон“; Универзитетската клиника за психијатрија; Универзитетската клиника за физикална медицина и рехабилитација; Универзитетската клиника за неврологија; Универзитетската клиника за хирургија на лице, вилици и врат – максилофацијална хирургија; Универзитетската клиника за дерматологија; Универзитетската клиника за ревматологија; Универзитетската клиника за ендокринологија, дијабетес и метаболични нарушувања, како и на Психијатриската болница „Скопје“.
Разрешен е и медицинскиот директор на Општата болница „Ферид Мурад“ во Гостивар.