Бугарскиот претседател денеска, прашан за средбата на претседателот Стево Пендаровски со ОМО Илинден, рече дека за жал постапките и однесувањето на претседателот на Република Северна Македонија не придонесуваат за толку посакуваниот напредок на РСМ кон ЕУ, а за нив рече дека имале сепаратистички ставови
Од здружението на Македонците во Бугарија „ОМО Илинден Пирин“ денеска реагираат на изјавата на бугарскиот претседател Румен Радев, која како што посочуваат е неодговорна, објави Радио Слободна Европа.
„Неговата изјава е лага и клевета и како таква е срамна за сите, а особено за претседателот бидејќи срамот паѓа на сите граѓани. Нашата партија никогаш не пропагирала сепаратистички идеи. Досега ниту една македонска организација или Македонец во Бугарија не е обвинет, суден или осуден за сепаратистички дејствија. Лагата за сепаратизам се користи за да се оправда систематската дискриминација на која подлежат бугарските граѓани со македонска самосвест, што доведе до 14 пресуди против Бугарија од страна на Судот за човекови права“,
велат од „ОМО Илинден Пирин“.
Дискриминацијата на Македонците во Бугарија, како што наведуваат, се рефлектирала во секој извештај на меѓународна институција за човекови права во врска со Бугарија во изминатите 18 години, и затоа земјата била ставена под зголемен мониторинг во Комитетот на министри.
„Но, освен лаги и клевети, изјавата на Радев е израз и на ниска политичка култура. Тој ги поврзува малцинските права со сепаратизмот и во нив гледа нешто лошо и неприфатливо. Да го потсетиме дека Бугарија ја ратификуваше Рамковната конвенција за заштита на националните малцинства и дека Република Бугарија во минатото официјално го призна македонското малцинство, кое оттогаш беше подложено на брутален прогон во комунизмот. А за информација на Радев, бидејќи тој одбива не само да не прими, туку дури и да одговори на нашите барања за средба- се бориме за демократизација и европеизација на Бугарија, за човекови права, за запирање на негирањето на македонското малцинство, запирање на систематската дискриминација, стигматизација, говор на омраза и маргинализација применети против него“,
додаваат од организацијата.
Оттаму порачуваат и дека сакаат да им овозможат на бугарските граѓани со македонска самосвест рамноправно и целосно да учествуваат во јавниот и политичкиот живот во земјата. Нешто што, според „ОМО Илинден Пирин“, во моментов систематски им се ускратува. На крајот заклучуваат дека е срамота Бугарија да ја водат политичари со сличен начин на размислување.
Бугарскиот претседател денеска, прашан за средбата на претседателот Стево Пендаровски со ОМО Илинден, рече дека за жал постапките и однесувањето на претседателот на Република Северна Македонија не придонесуваат за толку посакуваниот напредок на РСМ кон ЕУ, а за нив рече дека имале сепаратистички ставови.
„Секое барање за реципроцитет во граѓанските права е контрапродуктивно. Македонските Бугари се борат за еднаквост, која ќе биде загарантирана во нивниот устав со регистрирање. Тие се борат за нивна целосна интеграција во јавниот живот на државата. Тоа е радикално различно од сепаратистичките ставови и малцинските тврдења што ги исповедува народот со кој се среќава претседателот Пендаровски“,
изјави Радев.