Пратениците од власта и од опозицијата, пак, повторно разменија спротивставени ставови во однос на Извештајот и процесите за почеток на преговорите со ЕУ во текот на денешната расправа во Комисијата за европски прашања
Евроамбасадорот Дејвид Гир ги повика пратениците во македонското Собрание на конструктивен дијалог, посебно за ЕУ-агендата, а во текот на расправата за Извештајот на ЕК за напредокот на земјата за 2021 година, кој беше разгледан на денешната седница на собраниската Комисија за европски прашања. Пратениците од власта и од опозицијата, пак, и во оваа пригода разменија спротивставени ставови во однос на Извештајот и процесите за почеток на преговорите со ЕУ.
Гир повтори дека Извештајот потврдува дека земјата ги исполнува условите за старт на преговорите, но и дека треба да продолжи со реформите за остварување натамошен напредок кон нивната имплементација во борбата против корупцијата и организираниот криминал, владеењето на правото, во изборното законодавство, во јавната администрација. Земјата, рече, ја има поддршката од ЕУ за постигнување на овие цели.
„Извештајот повикува на зајакнување на улогата на парламентот, да се води конструктивен дијалог, особено во поглед на европската реформска агенда. Се констатира дека постои поларизација, особено во поглед на ковид 19. Парламентот продолжува со својата легислативна функција, но се забележува дека треба да има помала и ограничена употреба на скратените постапки за носење на законите. Многу е важно да има соработка меѓу различните политички партии за успех во реформите. Затоа ги повикувам сите пратеници да соработуваат за да се постигнат заедничките цели за исполнување на европската агенда“,
рече амбасадорот Гир.
Собраниската Комисија за европски прашања го разгледува Извештајот на ЕК со задоцнување од четири месеци, а нејзиниот претседател Арбер Адеми рече дека до тоа дошло поради застојот во работата на парламентот за време на локалните избори, а потоа и по оставката и изборот на нова влада.
„Евроинтеграцијата е прашање околу кое треба да имаме обединет пристап за да можеме поефикасно да ги спроведеме реформите во заеднички интерес на сите политички партии, но и на целата држава. Темпото на реформите најмногу зависи од нашата посветеност и искрен пристап, како и од широкиот консензус во општеството, но исто така и во ова наше Собрание. Формалниот почеток на пристапните преговори секако дека ќе го обезбеди неопходниот поттик за спроведување на подлабински реформи со забрзана динамика, не само во усогласување со правото на ЕУ, туку и во суштинска имплементација на донесените закони. Сепак тоа не значи дека ние, додека ги почнеме преговорите, ќе седиме и ќе чекаме. Напротив, многу скоро очекуваме нов приспособен реформски план со нови задачи“,
рече новиот вицепремиер за европски прашања Бојан Маричиќ.
Претседателот на Комисијата, Адеми, пак, се осврна и на односите со Бугарија, нагласувајќи дека и во двете земји има нови влади кои дадоа нов импулс и раздвижување на билатералната соработка.
„Ако не беше бугарското вето, Советот ќе ја усвоеше преговарачката рамка и ќе ја одржевме првата меѓувладина конференција согласно мартовската препораката од 2021 година, кога членките на Европскиот совет ја одобрија одлуката за отворање на преговорите. Доколку сме целосно фокусирани да ги започнеме преговорите неопходна е нашата посветеност на добрососедските односи и регионалната соработка и опипливи резултати во спроведувањето на билатералните спогодби и европските реформи“,
рече Адеми.
Пратеничката од ВМРО-ДПМНЕ, Жаклина Пешевска, се осврна на забелешките во Извештајот каде што земјата е оценета со пониски оценки во однос на претходниот извештај, како што е во делот на правосудство и фундаменталните права, јавното обвинителство и судството.
„Во Извештајот стои дека опозициските партии останаа активно вклучени во Собранието и во одредени случаи ги поддржаа клучните закони поврзани со ЕУ. Моето прашање е дали мнозинството во Собранието е доследно на својата задача и одговорност бидејќи многу пати немаат кворум на работните тела и седниците. Во однос на транспарентноста на власта, ние имаме 45 до 50 проценти закони донесени на брза лента со флагрантно кршење на процедурите од деловникот и злоупотреба на европското знаме и за закони кои не се усогласуваат со европското законодавство“,
рече Пешевска.
Пратеничката Снежана Калевска Ванчева од СДСМ оцени дека е важно градењето парламентарна демократија, вистински демократски процеси кои подразбираат вистинска дискусија и консензус помеѓу сите претставници во законодавниот дом на вистински начин, бидејќи, вели таа, во Собранието почнува и завршува се.
„Без критика нема напредок, но дали критика е отворен критицизам, кочење на се што може да се закочи само по цена да се дојде на власт. Не би рекла дека се тоа демократски процеси. Но ние ќе продолжиме да подаваме рака, заедно да го одиме патот кон ЕУ и знам дека на крајот ќе го постигнеме тоа што треба да го завршиме како наша домашна задача“,
рече Калеска Ванчева.
Во однос на преговорите со ЕУ, таа рече дека очекува да се случат оваа година, иако, вели, тоа не зависи од тоа колку сме добри и посветени, туку од ирационалниот спор со Бугарија, кој мора да го решиме.
„Она што се случува последниот месец дена во односите со Бугарија е добро и само на таков начин можеме да дојдеме до приближување. Нам ни треба вистинско запознавање, запознавање на она што е во нашата колективна меморија врежано од двете страни. Говорот на омраза треба да се претвори во говор на добрососедство, во конструктивност. Но, за жал, ние сè уште имаме говор на омраза во ова Собрание, во нашата држава, непочитување на едни со други и тоа се прелева и надвор. Тоа е нешто на кое мора да работиме многу во следниот период, како што мора да работиме на реформите во правосудството, спречување на корупцијата, зголемување на нивото на транспарентност, за што имаме прилично висока оценка“,
рече Калевска.