Предметот е оформен по допрен глас и засега опфаќа два смртни случаи – жена и маж за кои има сознанија дека по извршени операции добиле интерхоспитална бактерија од која починале. Дел од предметот ќе биде испитување на уште еден случај во кој 30-годшно лице наводно десетина дена било лекувано со погрешна терапија
Обвинители ќе ги проверуваат случаите со двајца починати пациенти во Општата болница во Прилеп откако во јавноста излегоа информации дека имало интерхоспитална бактерија која била причината за смртта.
„Основното јавно обвинителство (ОЈО) Прилеп по допрен глас оформи предмет по информациите за смрт на две лица во ЈЗУ Општа болница Прилеп – жена на возраст од 48 години и непознато машко лице кај кои биле извршени оперативни зафати по што добиле интерхоспитална бактерија од која починале. Според сознанијата, веднаш по овие случаи сите оперативни сали во болницата биле затворени“,
велат од ОЈО Прилеп.
Предметот опфаќа уште еден случај, за кој не е наведено дека бил со смртен исход, туку само дека има информации оти 30-годишен пациент бил несовесно лекуван на Одделот за неврологија. Пациентот, како што велат од ОЈО Прилеп, наводно бил лекуван десетина дена со погрешна терапија.
„Со цел да ги провери овие информации и евентуална кривична одговорност, надлежен јавен обвинител издаде барања за прибавување на целокупната писмена документација во врска со овие случаи од Државниот санитарен и здравствен инспекторат Прилеп и од ЈЗУ Општа болница Прилеп. Издадена е и наредба до МВР – ОВР Прилеп да изврши информативни разговори со службени лица во болницата, со роднини и блиски лица на пациентите“,
велат од ОЈО Прилеп.
Откако ќе се направат проверки, обвинителките ќе решат дали има основа за кривично гонење и како ќе постапуваат понатаму.