Со предниот десен дел од мотоциклот го удрил 10-годишното девојче кое го поминувало коловозот на пешачки премин и кое се здобило со тешка телесна повреда – скршеница
Основното јавно обвинителство Скопје соопшти дека поведе истражна постапка против 33-годишен скопјанец што со мотоцикл на улицата „Џон Кенеди“ удри 10-годишно девојче што преминувало на пешачки премин.
За скопјанецот постои основано сомнение дека сторил тешки дела против безбедноста на луѓето и имотот во сообраќајот по член 300 став 1 во врска со член 297 став 1 од Кривичниот законик, кој на 25 април како учесник во сообраќајот не се придржувал кон правилата па го загрозил јавниот сообраќај и го довел во опасност телото на луѓето.
„По десната сообраќајна лента од улицата ‘Џон Кенеди’ управувал мотоцикл ‘пиаџо веверли’ со скопски регистарски ознаки и тоа без заштитен шлем и без да поседува возачка дозвола од A-категорија за тој вид мотоцикл. Кога дошол пред влезот на основното училиште ‘Васил Главинов’, на обележан пешачки премин не обрнал внимание на пешаците кои започнале да чекорат и имал обврска да ги пропушти. Со предниот десен дел од мотоциклот удрил во телото на оштетеното 10-годишно девојче кое го поминувало коловозот на пешачкиот премин. Од ударот девојчето се здобило со тешка телесна повреда – скршеница“,
стои во соопштението на ОЈО.
Со цел обезбедување на осомничениот во текот на постапката, од ОЈО наведуваат дека јавниот обвинител предложил да му бидат определени мерки за претпазливост, а судот го прифатил предлогот.