Основното јавно обвинителство Скопје поднесе обвинителен предлог против поранешниот претседател на Врховниот суд, Јово Вангеловски, за злоупотреба на службена положба и овластување поради тоа што на една судијка намерно во ноември 2018 година не ѝ определил додаток на плата од 35 отсто, за разлика од останатите нејзини колеги.
„На 30.11.2018 година во својство на службено лице – претседател на Врховниот суд на Република Македонија, обвинетиот донел поединечни решенија за сите судии на Врховниот суд со кои им го утврдил додатокот на плата за месец ноември во износ од 35 проценти од основната плата, кој согласно законот им следува за посебни услови за работа, постоење на висок ризик и доверливост. Притоа, свесно, со намера потешко да и ги повреди правата, обвинетиот не донел Решение за исплата на додаток на плата во износ од 31.839,00 денари за оштетената – судија во Врховниот суд, која во конкретниот период не користела отсуство од работа“,
се вели во соопштението од ОЈО.
Со ова, според ОЈО, Вангеловски постапил спротивно на член 7-б од Законот за платите на судиите и член 7 од Правилникот за додатоци на плата, нивната висина и начинот на утврдување за судиите во Република Македонија донесен од Судскиот совет на Република Северна Македонија, со што го сторил кривичното дело кое му се става на товар за злоупотреба на службена положба и овластување од член 353 став 2 во врска со став 1 од Кривичниот законик.