За денеска напладне е закажано продлжението на собраниската конститутивна седница, соопштија од собраниските служби.
На продолжението, досегашниот прв човек на Собранието, Талат Џафери, треба повторно да биде избран за претседател на законодавниот дом.
Претседателот на Собранието се избира со најмалку 61 глас од вкупниот број пратеници.
Предлогот за избор на Џафери е поднесен во Собранието со потписи од сите 62 пратеника од парламентарното мнозиинство што го сочинуваат СДСМ и Коалицијата „Можеме“ со Беса, ДУИ и ДПА.
Тоа значи дека и двајцата пратеници од ДУИ, Изет Меџити и Арбен Зибери, се потпишале на предлогот за избор на Џафери.
Нивното незадоволство од партиските кадри кои се предложени за министерските позиции беше причина за вчера да не се одржи продолжението на конститутивната седница. Неизвесно е дали овие недоразбирања се надминати и дали овие двајца пратеници ќе дадат поддршка за избор на влада.
Според Деловникот на Собранието, кандидат за претседател на законодавниот дом предлага или Комисијата за прашања на изборите и именувањата или најмалку 20 пратеници.