Според важечкиот закон, теренскиот дел од пописот треба да почне утре, така што се чека спикерот да закаже седница за да се донесат законски измени и операцијата да се премести за септември
Претседателот на парламентот Талат Џафери закажа прес-конференција во 14 часот, по денешната координација со пратеничките групи, откако премиерот Зоран Заев по средбата со претставници на Алијанса/Алтернатива изјави дека конечниот збор за донесување на измените на Законот за попис го има парламентот.
Поточно, претседателот на парламентот Талат Џафери треба да закаже седница на чиј дневен ред ќе ги стави измените на Законот за попис, така што операцијата, која треба да почне утре, би се одложила за септември, како што договорија лидерите на СДСМ и на ВМРО-ДПМНЕ во понеделникот.
„Ако нема промена на Законот, тогаш секако дека треба да тече пописот, освен ако парламентот испрати јасен сигнал дека има мнозинство за донесување законски измени, со кои ќе се смени и терминот за спроведување на пописот. Во тој дел веќе е испратена порака дека имаме и повеќе од двотретинско мнозинство“,
рече Заев коментирајќи ја изјавата на Џафери дека не се согласува со одложување на пописот.
На прашање дали може да гарантира дека, по неколку одложувања, во септември ќе се спроведе пописот, Заев рече дека никој не може да гарантира каква ќе биде ситуацијата во септември и дали ќе има нов бран на ковид-19, ама, како што посочи, тој како премиер може да гарантира дека ќе направи сѐ за процесите да бидат квалитетни и успешни. Тој рече дека, освен што има големо мнозинство за донесување на Законот за попис, не претставува проблем ниту да се обезбеди Бадентерово мнозинство.
Наспроти спикерот Џафери, претседателот Стево Пендаровски вчера го поздрави договорот Заев-Мицкоски и нагласи дека тој треба и да се спроведе.