Конечен извештај ќе биде објавен околу осум недели по денот на изборите, со заклучоци и потенцијални препораки, вели Лаима Андрикиене – шефицата на специјалната мисија на ОДИХР во земјава
ОБСЕ/ОДИХР внимателно го следи процесот на гласање во услови на пандемија и со прелиминарни наоди и заклучоци во врска со изборниот процес ќе излезе на 16 јули, а конечниот извештај ќе го објави осум недели по денот на изборите, со заклучоци и потенцијални препораки, вели во интервју за МИА, Лаима Андрикиене – шефицата на специјалната мисија на ОДИХР во земјава.
„Набљудувачките мисии на ОДИХР се посветени на принципот на немешање и затоа не издаваме проценка пред денот на изборите, но на 16 јули ќе издадеме изјава за прелиминарните наоди и заклучоци во врска со изборниот процес. Истиот ден ќе одржиме прес-конференција на која ќе ги презентираме овие наоди. Нашиот конечен извештај ќе биде објавен околу осум недели по денот на изборите, со заклучоци и потенцијални препораки“,
вели Андрикиене.
Основниот тим се состои од девет члена од девет земји-учеснички во ОБСЕ. За тековниот формат на Специјалната мисија за проценка на изборите, распоредена во Северна Македонија, имаат акредитирано 26 набљудувачи, во кои спаѓаат меѓународните експерти и националниот персонал за поддршка.
„Ние сме тука да ја процениме усогласеноста на изборниот процес со меѓународните обврски и стандарди, како и со националното законодавство. Ние сме многу заинтересирани да ги следиме мерките што се применуваат во различни фази на изборниот процес заради пандемијата на КОВИД-19, така што внимателно ги следиме и прилагодувањата на постапката на денот на гласање. Во исто време, би сакала да истакнам, дека ние самите живееме и работиме строго според дадените препораки“,
истакнува шефицата на мисијата на ОДИХР