На одбележувањето на 21-годишнината од загинувањето на бранителите, венци цвеќе положија и почит оддадоа повеќе државни делегации
Во Општина Ѓорче Петров денеска на три локаци беше одбележана 21 година од загинувањето на бранителите кај Љуботенски бачила. Бројни делегации, членови на семејствата, претставници на политички партии и на здруженија оддадоа почит на централната манифестација, што се одржа кај Споменикот на бранителите во Волково.
Делегација на Владата на Република Северна Македонија предводена од министерката за одбрана Славјанка Петровска, во придружба на советникот за одбрана на претседателот на Владата, Драган Василевски, во касарната „Илинден“ и во село Љубанци оддаде почит и положи цвеќе на спомен обележјата поставени во чест на осумтемина припадници на резервниот состав на Армијата, загинати кај месноста Љуботенски бачила, кога во 2001 година за време на вооружениот конфликт, армиско товарно возило нагази на две противтенковски мини.
„Некои дадоа сè… а ние сме вечно обврзани да го славиме нивното херојство, пожртвуваноста и љубовта кон државата. Во сеќавање на осумтемина загинати бранители, припадници на резервниот состав на Армијата, кои загинаа кај месноста Љуботенски бачила, оддаваме почит на спомен обележјето на загинатите бранители кај Љуботенски бачила и во касарната „Илинден“ во Скопје“,
напиша министерката Петровска на Фејсбук.
Во име на Владата, советникот Василевски оддаде почит и положи цвеќе и во Ѓорче Петров и село Волково, во знак на сеќавање на загинатите бранители, Томе Бадаровски, Гоце Чанкуловски, Бранко Јанев, Томислав Настевски, Марјанчо Бошковски, Ивица Златевски, Томе Димовски и Раде Јанковски.
И делегациja од Кабинетот на Претседателот на Република Северна Македонија, во состав полковник Билјана Блажеска, аѓутант на претседателот и Валентин Диневски, посебен советник за безбедност, по повод 21-годишнината од загинувањето на осум армиски резервисти кај месноста Љуботенски бачила, положи цвеќе пред спомен-обележјата во општина Ѓорче Петров и во Волково, пред спомен-обележјето во село Љубанци и во касарната „Илинден“ во Скопје.
Цвеќе беше положено и на спомен-чешмата на Томислав Настевски-Бумбар и на Споменикот на бранителите во реонскиот парк.
На 10 август 2001 година кај месноста Љуботенски бачила од нагазна мина поставена на патот животот го загубија Томе Бадаровски, Марјанчо Бошковски, Томе Димовски, Ивица Златевски, Бранко Јанев, Раде Јанковски, Томислав Настевски и Гоце Чанкуловски.