Наспроти информациите од терен за застои во операцијата, oд ДЗС посочуваат дека досегашната динамика на попишувањето е гаранција дека, заклучно со 30 септември, успешно ќе бидат попишани населението, домаќинствата и становите
Пописот на населението, домаќинствата и становите, кој почна да се спроведува на цела територија на Северна Македонија на 5 септември, се одвива со голема поддршка и интерес од граѓаните. Потврда за тоа е големата бројка на попишани граѓани, тврдат од Државниот завод за статистика, и покрај проблемите со апликацијата што се појавија уште на вториот ден од пописот и јавувањата од терен за подолги застои во попишувањето во изминатите денови.
„Само во првите четири дена со попишувањето се опфатени повеќе од 200 000 граѓани“,
информираат денеска од Државниот завод за статистика.
ДЗС, како што пренесува МИА, изразува благодарност до сите граѓани кои, како што велат, се свесни за важноста од спроведување на оваа најобемна статистичка операција и се конструктивен партнер во процесот.
„Во тек е надминување на помали технички предизвици кои повремено се појавуваа претходните денови, кога на терен имаше висок интензитет на попишување. Сите внесени податоци се успешно процесирани во системот, а техничките усогласувања се прават со цел процесот да продолжи со несмален интензитет“,
се вели во соопштението од ДЗС.
Од ДЗС посочуваат дека досегашната динамика на попишувањето на терен е гаранција дека заклучно со 30 септември успешно ќе бидат попишани населението, домаќинствата и становите на територијата на целата земја.
Попрецизно, од ДЗС информираат дека во првите четири дена од пописот се попишани вкупно 199 313 лица, 57 470 домаќинства и 65 222 стана.
Можноста за самопопишување на лица во странство, до вчера во во 07:30 часот, ја искористиле – 192 095 лица.