Од затворот во Шутка направил хотел, поранешниот директор да се исклучи од ЦО на СДСМ – бараат од ВМРО-ДПМНЕ

Според пратеникот Петрушевски, затворениците биле изнесувани од затворот од страна на униформирани лица кои тајно ги транспортирале до местото до кое тие сакаат, со службени возила и службени ресурси

Опозицискиот Социјалдемократски сојуз да го осуди и да го исклучи од членство во Централниот одбор, Филип Андов – Сокол, бидејќи од затворот во Шутка направил хотел, а тешки криминалци излегувале кога сакаат. Ова денеска го соопшти пратеникот на владејачката ВМРО-ДПМНЕ, Бране Петрушевски, откако вчера дел од медиумите објавија дека се спроведува полициска акција во која се опфатени сегашни и поранешни вработени во затворите, меѓу кои и ексдиректорот на истражниот затвор во Шутка, Филип Андонов – Сокол и заповедникот во истиот затвор Сашо Крстевски – Ѕверот.

„Филип Андов – Сокол кој е член на ЦО на СДС на Венко Филипче, поранешен советник на Заев и директор на Ковачевски е доказ дека во СДС ништо не е сменето, туку на функции се криминалци. Тој како директор на затворот во Шутка овозможил криминалци во притвор за сериозни кривични дела да го напуштаат затворот и по 8 до 10 часа во текот на денот. Криминалците кои Сокол ги пуштал во ниту еден случај не смееле да го напуштат притворскиот затвор“, _{вели Петрушевски.}

Според него, затворениците биле изнесувани од затворот од страна на униформирани лица кои тајно ги транспортирале до местото до кое тие сакаат, со службени возила и службени ресурси.

„Со Филип Андов – Сокол државата буквално работела за криминалци“, _{рече тој.}

Посочи дека СДС треба јавно да се извини и да го разреши Сокол од Централниот одбор.

Претреси на повеќе локации во Скопје – цел на акцијата лица со полициски овластувања и припадници на затворската полиција

Министерството за внатрешни работи (МВР) во координација со јавен обвинител, по претходна судска наредба вчера вршеше претреси на повеќе локации во Скопје.

Според неофицијални информации објавени во дел од медиумите, во акцијата се опфатени сегашни и поранешни вработени во затворите, меѓу кои и ексдиректорот на истражниот затвор во Шутка, Филип Андонов – Сокол и заповедникот во истиот затвор Сашо Крстевски – Ѕверот.