Од Владата велат дека со тонот, инсинуациите и тајмингот избран да се пласираат невистини, професорот Ванчо Ѓорѓиев си дозволил да го искомпромитира сопствениот научен интегритет и да пласира политички пораки кои немаат никаква врска со реалноста и работата на Комисијата
Од Владата реагираат на образложението на историчарот Ванчо Ѓорѓиев со кое тој денеска поднесе оставка како член во мешовитата Комисија за историски и образовни прашања меѓу С Македонија и Бугарија.
Од Владата велат дека во ниту еден момент ниту се мешале, ниту имале било какво политичко влијание во работата на Комисијата, туку, напротив, секогаш ја поддржувале нивната работа, како научници кои сами, заеднички двете страни, ги утврдиле своите принципи на работа.
„Категорично отфрламе било каква инсинуација дека имало какво било влијание на одлуката на професорот Ванчо Ѓорѓиев да го прекине својот ангажман како член на Комисијата од страна на Владата или било која нејзина институција. Поаѓајќи од начелото на целосна независност и слобода во работата на Комисијата, секој член на нашиот дел од Комисијата има право да донесе одлука во врска со понатамошното учество. Во случајот за професорот Ванчо Ѓорѓиев ја информираме јавноста дека само пред една недела професорот Ѓорѓиев го потпиша со слободна волја договорот за продолжување на неговиот ангажман како член на Комисијата“,
велат од Владата.
Понатаму, тие сметаат дека со тонот, инсинуациите и тајмингот избран да се пласираат невистини, професорот Ванчо Ѓорѓиев, си дозволил да го искомпромитира сопствениот научен интегритет и да пласира политички пораки кои немаат никаква врска со реалноста и работата на Заедничката мултидисциплинарна експертска комисија за историски и образовни прашања на С Македонија и Бугарија.
„Со ова соопштение укажуваме на овие непобитни факти, ја почитуваме неговата одлука и се заблагодаруваме за неговиот досегашен ангажман“,
се вели во соопштението на владината прес-служба.