Власта го претстави планот за спроведување европеизација дома паралелно со битката за почеток на преговори. Вицепремиерот Димитров, пак, најавува средби на меѓународен план, вели дека има шанси за исчекор во мај и јуни и тврди дека има растечка и голема решеност да се постигне успех
Агенда „Европа дома“ е документот кој денеска го усвоила Владата на седница, а се состои од реформски активности како на Владата, така и на другите институции, како Собранието, правосудните органи, ДИК, Државната комисија за спречување корупција и други агенции, со што треба да се спроведе целосна европеизација на системот.
Документот денеска го презентираа премиерот Зоран Заев и вицепремиерот за европски прашања Никола Димитров, во друштво на вицепремиерот за борба против корупција Љупчо Николовски и министрите за правда и за финансии, Бојан Маричиќ и Фатмир Бесими.
„’Европа дома‘ е своевиден роковник со утврдени активности и нивни носители кои во точно одреден рок треба да ги завршат своите обврски за да ги унапредиме институциите и системот. Преку тоа граѓаните ќе добијат подобри услуги и подобар живот и уште еднаш да докажеме дека Северна Македонија го заслужува местото во ЕУ и дека природно припаѓа во европското семејство на народи“,
изјави Заев.
Тој рече дека тоа што Бугарија не даде согласност за Преговарачката рамка и понатаму одржување на првата меѓувладина конференција со што би започнале преговорите, нема да ја обесхрабри власта.
Агендата, како што презентираа, се потпира на новата методологија за преговори, во фокусот се областите кои се дел од првиот кластер – темели/основи односно: изборната реформа, правосудството, борбата против корупцијата и криминалот, човековите права, медиумска реформа, јавна администрација, економско владеење. Дополнително, документот вклучува и приоритети во областа животна средина и климатски промени.
„Сè се ова полиња во коишто имаме работа. Токму затоа неопходен беше еден ваков сеопфатен план со јасни задачи и рокови за сите вклучени. Без разлика на одложувањето на процесот, ние нема да креваме раце и паралелно со битката за формален почеток на пристапните преговори, ќе си ја туркаме и домашната агенда на промени. Меѓу другото, тоа мене, како вицепремиер за европски прашања ми е и еден од главните мотиви и предизвици – напредокот за којшто зборува ЕУ во извештаите, да го симнеме од лавиринтите на хартиите и администрацијата на ниво на коешто ќе го почувствуваат самите граѓани, преку коренити промени во функционирањето на самиот државен систем“,
рече Димитров.
Според најавите, реформите ќе бидат транспарентни и ќе се мониторираат односно Секретаријатот за европски прашања (СЕП) на неделна основа ќе презентира извештаи до Владата, додека ќе има и три опширни извештаи во мај, септември и декември.
Вицепремиерот зборуваше и детално за областите, па така за правосудството рече дека се предвидува целосно спроведување на веќе донесените закони, но и јакнење на човечките и техничките капацитети на судовите и јавните обвинителства, како и екипирање на истражните центри, но и на капацитетите на Академијата за судии и јавни обвинители.
Агендата предвидува и подобрување на соработката помеѓу антикорупциската комисија и Владата, како и спроведување на препораките од антикорупционерите.
Кога се во прашање медиумските реформи, пак, во фокусот ќе биде јакнење на професионалноста и независноста на јавниот сервис и Агенцијата за аудио и аудиовизуелни услуги (АВМУ), но и поголема заштита на новинарите.
Најавите за јавната администрациј, пак, се во насока на продолжување на процесот на реорганизација и оптимизација, како и фокус на транспарентноста, системот на професионални заслуги и соодветна и правична застапеност на етничките заедници.
„Европа дома“ вклучува и зајакнато следење на мерките за зачувување на статусот на Охрид како град на УНЕСКО.
Вицепремиерот Димитров рече дека и неговиот ресор, СЕП, има домашна задача, а тоа е ревизија на механизмот за управување и координација на пристапните преговори со цел негово усогласување со новата методологија на преговори.
Додека на домашен план власта ветува европеизација, истовремено посочува дека се прават и напори за отстранување на ветото од Бугарија. Заев посочи дека продолжуваат политичките и дипломатските напори, а Димитров рече дека поголеми се шансите Северна Македонија и проширувањето да се најдат на агендата кон мај-јуни, отколку на Европскиот совет закажан за 25 и 26 март.
„По усвојувањето на агендата ‘Европа дома’ договорам неколку посети. Чекам конкретен датум од еден од членовите на кабинетот на Меркел. Во принцип во политичка смисла овој совет е некако преблиску до изборите во земјата членка со која ние имаме предизвик. Реалните можности за пробив се повеќе кон мај-јуни. Има растечка и голема решеност да има успех, ние имавме добра, чиста и јасна одлука во март минатата година која не се реализираше. Нам, на регионот, на Европа ѝ треба тој успех. Мислам дека по завршување на неколку изборни циклуси во важни земји членки, а и во земја кандидат – Албанија, се создава една атмосфера каде мислам дека ќе има сериозен обид да се најде начин да има консензус за усвојување на Ореговарачката рамка и конечно да ја имаме првата меѓувладина конференција“,
изјави Димитров.