Иако епидемија е прогласена во Скопје и Куманово, болни лица со пертусис има и во други градови. Вакцинацијата против голема кашлица се одвива добро, а еден од главните показатели е тоа што веќе подолго време нема хоспитализирани деца на Детската клиника
Од први јануари до денеска во Македонија се регистрирани 410 случаи на пертусис, а од нив само шест биле лекувани болнички на Детската клиника. Оние што добиле болнички третман се претежно доенчиња, а позитивен податок е дека долго време нема хоспитализирани лица на клиниката, вели директорката на Универзитетската клиника за детски болести – Скопје, Валентина Цвејоска-Чолаковска.
„Вакцинацијата против пертусис се одвива на задоволително ниво, а подолго време нема хоспитализирано дете со пертусис на оваа клиника“,
вели Цвејоска-Чолаковска.
Директорката вели дека следува период на алергии, па на клиниката доминираат случаи со алергиски симптоми. Она што загрижува е што на светски рамки се појавуваат алергии какви што досега немало, па затоа се очекува дека кон средината на 21 век секое второ дете да има некаква алергија.
„Постојат многу причини за зголемување на алергиите кај децата, а тука спаѓаат и аерозагадувањето но и каква е исхраната кај децата“,
рече Цвејоска-Чолаковска.
Кога станува збор за лекот „трикафта“ и состојбата на луѓето со цистична фиброза, Цвејоска-Чолаковска вели дека има и пациенти под 12 години кои го примаат лекот, а рече и дека процедурата за набавка на овој лек завршила минатата недела и очекуваат нови количини да пристигнат во текот на месецот.