Од овој месец за 30 отсто поевтин роаминг за македонските граѓани со земјите од ЕУ, од 2028 г. цените се изедначуваат

Освен ова намалување, роаминг-услугите до 2026 година, како што рече Алиу, ќе се намалат за уште 30 отсто, а очекувањата се во 2028 година цените за роаминг да бидат исти како цените на тие услуги што ги има на домашниот пазар

Од овој месец стапи во сила договорот меѓу операторите на ЕУ и на Западен Балкан со кој има намалување на цените за роаминг-податоците во склоп на Европската Унија, потврди денеска министерот за информатичко општество и администрација Азир Алиу.

Тоа, според Алиу, значи дека македонските граѓани сега имаат 30 отсто поевтин роаминг со земјите од ЕУ.  

„Нашите граѓани и бизнисот од Северна Македонија кога ќе одат надвор веќе имаат 30 отсто помали трошоци за роаминг и обратно, значи граѓаните или бизнисите од ЕУ во РСМ ќе имаат 30 проценти намалени трошоци за роаминг“,

рече министерот Алиу.

Во однос на тоа со договорот колкави би биле цените, Алиу рече дека тие се во надлежност на операторите.

„Операторите очекуваме овие денови да излезат со понуди, со пакети во коишто ќе ги имаат, ќе ги понудат (цените), бидејќи Договорот е помеѓу операторите на ЕУ и операторите на Западен Балкан“,

рече министерот Алиу.

Освен ова намалување, роаминг-услугите до 2026 година, како што рече Алиу, ќе се намалат за уште 30 отсто, а очекувањата се во 2028 година цените за роаминг да бидат исти како цените на тие услуги што ги има на домашниот пазар.

„Тоа значи дека во 2028 година истите цени ќе ги имаме како внатре така и надвор од државата“,

вели Алиу.  

Од октомври пониски цени во роаминг меѓу земјите од Западен Балкан и ЕУ

На новинарско прашање Алиу посочи дека сите оператори се согласиле да ги намалат цените и оти од операторите зависи како ќе комуницираат со граѓаните и дали ќе информираат преку кампањи бидејќи станува збор за приватен сектор.

Во декември минатата година, на Самитот за Западен Балкан – Европска Унија, кој се одржа во Тирана, телекомуникациските оператори од земјите од ЕУ и Западен Балкан потпишаа договор со кој се овозможува намалување на цените за роаминг меѓу ЕУ и регионот.

Со договорот се предвидува, Северна Македонија, Албанија, Србија, Црна Гора, Косово и БиХ да имаат пониски тарифи во роаминг со земјите од ЕУ, а тарифите блиски до националните нивоа на цени се планира да се постигнат до 2027 година.

Потпишан договор во Тирана: Следната година ќе имаме поевтин роаминг со земјите од ЕУ

По стапувањето во сила на регионалниот договор за намалување на цените на роаминг, со кој беше укинат роамингот во Западен Балкан од јули 2021 година, Советот за регионална соработка, во соработка со Европската комисија, операторите од Европската унија и од Западен Балкан, како и со властите од регионот, работеа на намалување на цените на роаминг меѓу ЕУ и регионот.

На 1 јули 2021 година се укина роамингот за телефонски разговори, СМС и интернет меѓу Северна Македонија, Србија, Црна Гора, Албанија, Косово и Босна и Херцеговина. Со тоа се заокружи примената на Договорот од Вториот дигитален самит од 2019 година меѓу шесте држави од Западен Балкан.