Според партијата, Филипче, како продолжена рака на Заев, и додека му го чува партиското столче, треба да им каже на граѓаните дали поседува златна виза и дали има луксузен стан во Дубаи
Владејачката ВМРО-ДПМНЕ денеска преку писмено соопштение прашува дали лидерот на Социјалдемократскиот сојуз на Македонија (СДСМ), Венко Филипче, и поранешниот лидер на партијата и поранешен премиер, Зоран Заев, имаат златни визи за Дубаи.
Покрај тоа, од партијата ги повикуваат Филипче и Заев да одговорат колку милиони им се трансакциите кон Дубаи.
„Тандемот Заев и Филипче да каже од каде му се милионските трансакции кон Дубаи. На кој начин ги стекнале тие средства и дали се тоа провизии од зделки и тендери во четири“,
прашуваат од ВМРО-ДПМНЕ.
Оттаму посочија и дека додека Заев, како инвеститор гради згради во Дубаи, Филипче му ја чува фотелјата во СДСМ.
„Заев со едната рака на срце се колнеше во македонската жица и тврдеше дека си ја сака земјата, додека со другата распродаваше и делеше стотици милионски тендери на своите роднини и фирми. Се празнеше буџетската каса, а народот осиромашуваше. Заев профитот и провизиите од криминалните зделки ги инвестира во Дубаи, каде си најде сигурно прибежиште“,
пишуваат од владејачката партија.
Според ВМРО-ДПМНЕ, Филипче, како продолжена рака на Заев и додека му го чува партиското столче, треба да им каже на граѓаните дали поседува златна виза и дали има луксузен стан во Дубаи.
„Додека Заев и Филипче се луксузираат во Дубаи и во слободно време се веселат со Харис Џиновиќ, народот поради нивните погрешни политики размислува како да го помине месецот“,
додаваат оттаму.
Изминатиот период ВМРО-ДПМНЕ преку соопштенија во јавноста прашува на кој начин поранешниот премиер и екслидер на СДСМ, Зоран Заев, стигнал до златна виза во Дубаи и дали ваква виза поседува и актуелниот лидер на Социјалдемократскиот сојуз, Венко Филипче.