Ѓ.М. е приведен во Хамбург, а се барал со осум потерници
Секторот за меѓународна полициска соработка при Министерството за внатрешни работи, во соработка со германската полиција, преку екстрадициска постапка го донесе во земјава лицето Ѓ.М., за кое се трагаше со осум потерници.
Како што информираат од МВР, Ѓ.М. е осуден на затворска казна со вкупно времетраење од 20 години за извршени тешки кражби и шверцување мигранти.
Покрај тоа, во рамките на оперативната акција „Бегалец“, МВР презема интензивни мерки и активности за пронаоѓање и приведување лица, кои се бараат за издржување на затворска казна на територијата на државата.
„Во периодот од 15 септември до 20 октомври на територијата на Република Северна Македонија се приведени над 100 лица за издржување затворска казна до 10 години и тие се спроведени во казнено-поправните институции“,
велат од МВР.
Одделението за потраги при Секторот за меѓународна полициска соработка продолжува со интензивните мерки и активности за пронаоѓање и приведување на лицата кои се бараат со потерници, додаваат од МВР.