Јавната расправа во Собранието за зајакнување на системот за безбедност во сообраќајот уследи по случајот со Фросина Кулакова која на 29 јануари беше смртно прегазена на пешачки премин на булеварот „Партизански одреди“
Намалување на бројот на сообраќајни прекршоци и кривични дела против безбедноста на јавниот сообраќај преку подигање на одговорноста и свеста на сите учесници, елиминирање на неказнивоста на сторителите, заострување на казнената политика преку изменување и дополнување на Кривичниот законик, како и на сите релевантни закони заради нивно меѓусебно усогласување најдоцна до крајот на 2025 година.
Ова се дел од десетте заклучоци што денеска едногласно беа донесени на јавната распарава во Собранието за потребата од измени на законската регулатива, а со цел зајакнување на безбедноста во сообраќајот.
Нив, по завршувањето на расправата, ги соопшти пратеникот на ВМРО-ДПМНЕ и претседател на собраниската Комисија за политички систем и односи меѓу заедниците, Љупчо Пренџов, кој изрази задоволство што заклучоците се едногласно усвоени.
Со нив, како што кажа тој, се бара од Министерството за внатрешни работи да ги забрза активностите околу целосно и ефикасно имплементирање на системот „Безбеден град“, кој ќе овозможи автоматско констатирање на сообраќајните прекршоци најдоцна до крајот на годинава. Дополнително треба да се донесе и меѓуресорски стратешки акциски план за забрзување на активностите за вмрежување меѓу МВР со судовите и обвинителствата со што ќе се овозможи побрза комуникација и намалување на можностите од злоупотреба на системот.
Заклучоците, како што рече Пренџов, ќе бидат доставени до Владата, Републичкиот совет за безбедност во патниот сообраќај (РСБСП), Агенцијата за аудио и аудиовизуелни медиумски услуги (ААВМУ) и до сите поканети учесници на јавната расправа, а ќе бидат објавени и на веб-страницата на Собранието. Тој очекува, дел од заклучоците и препораките да бидат вметнати во новиот Кривичнен законик.
„Овие заклучоци и препораки ќе бидат доставени до сите надлежни институции и очекуваме најдоцна до крајот на 2025 година да се постапува по нив. Што ќе биде ставено во новиот Кривичен законик ќе видиме кога ќе стигне во Собранието. За тоа како ќе изгледа Кривичниот законик на крајот на денот одлучуваат пратениците во Собранието, а се разбира дека како пратеници ќе имаме време, волја и желба да видиме што е тоа што е ставено во него согласно заклучоците од оваа расправа“,
рече Пренџов.
Говорејќи во врска со заострувањето на казните, тој кажа дека нема да лицитира со нив, додавајќи очекува за предложените казни да се изјаснат и да ги образложат експертите.
Јавната расправа почна на 7 февруари, а на неа се обратија министерот за внатрешни работи Панче Тошковски, министерот за правда Игор Филков, претседателот на Републичкиот совет за безбедност во патниот сообраќај Горан Ангелковски, професори од Правниот факултет и други претставници од надлежни институции.
Министерот за внатрешни работи тогаш рече дека фокусот не смее да биде само на законите, на заострување на казните, туку на градење на систем којшто ќе овозможи конкретно елимирање на неказнивоста.
Во делот на законските измени, тој меѓу другото побара да се предвиди инкриминирање на управување на моторно возило без положен возачки испит, да се размисли за воведување задолжителна мерка – одземање на возилото при најтешките случаи на безобѕирно возење, и да се прошират можностите на системот „Безбеден град“ во делот на автоматско санкционирање на нерегистрирани возила.
Иницијативата за јавната расправа уследи по случајот со Фросина Кулакова која на 29 јануари беше смртно прегазена на пешачки премин на булеварот „Партизански Одреди“ од страна на 20-годишниот Васил Јованов од Скопје.
Иницијативата за одржување на јавната расправа беше поднесена од страна на пратеници од владејачките ВМРО-ДПМНЕ, „Вреди“ и ЗНАМ, а поддршка дадоа пратениците од сите политички партии.