Во однос на оставката на премиерот Заев, односно дали знаат кога таа ќе се случи, бидејќи тоа би значело и оставка на цела Влада, Османи истакна дека наредниот период е исклучително важен за стратешките правци на државата за постигнување на одредени стратешки цели и секоја дестабилизација на Владата во овој период може дополнително да влијае негативно на постигнување на тие цели и да ја претвори државата од дел од решението во дел од проблемот
Шефот на дипломатијата Бујар Османи денеска повтори дека има мнозинство во Собранието и очекува тоа дополнително да се зголеми.
„Мнозинство има, тоа можам да го потврдам. Очекуваме со овие разговори, ова мнозинство да се зголеми дополнително и да биде стабилно за да може во наредните месеци и години да се продолжи со овие сериозни активности на Владата“,
изјави Османи на прес-конференцијата, одговарајќи на новинарско прашање, за состојбара во владината коалиција.
На новинарско прашање кој е тој 61 пратеник за кој СДСМ вели дека го има како владејачко мнозинство и дали можеби е тоа пратеник од Алијанса за Албанците, Османи рече дека нема да навлегува во детали, додека самите пратеници не излезат во јавноста да го соопштат тоа.
„Не можам да зборувам за конкретни решенија без да се заврши целиот пакет на преговори. Мислам дека самите пратеници ќе кажат кои се дел од мнозинството и ќе ја поддржат оваа евроатланска Влада. Очекувам следната недела да има конкретни решенија“,
рече тој.
На прашањето, дали се согласуваат со преговорите што ги води премиерот Зоран Заев, конкретно со Алтернатива, Османи рече дека се е усогласено меѓу владините партнери, а дека премиерот е овластен да ги води преговорите.
„Тие разговори се заеднички помеѓу сите коалициски партнери, меѓутоа во име на сите коалициски партнери истите ги спроведува премиерот, бидејќи ние имаме разговори, меѓутоа, конкретните детали во однос на програмата на Владата ги пренесува премиерот“,
објасни тој.
Во однос на оставката на премиерот Заев, односно дали знаат кога таа ќе се случи, бидејќи тоа би значело и оставка на цела Влада, Османи истакна дека наредниот период е исклучително важен за стратешките правци на државата за постигнување на одредени стратешки цели и секоја дестабилизација на Владата во овој период може дополнително да влијае негативно на постигнување на тие цели и да ја претвори државата од дел од решението во дел од проблемот.
„Мислам дека никој во државата не сака да се впери прст кон државата како причина за нерешавање на одредени прашања или, пак, незапочнување на преговорите со Европската Унија, бидејќи не бевме досега така. И покрај тоа што бевме предизвикани на сите можни начини, и внатре, и надвор, не дозволивме државата да биде дел од проблемот, туку да биде проактивната страна која се обидува да најде решение“,
истакна Османи кој дополни дека смета дека во овој период Владата треба да продолжи како што е, се разбира, како што рече, „со зајакнување на нејзините капацитети и поддршка во Собранието“.