„Испитани се поголем број службени лица од Општината Чаир, како и дел од барателите на легализација на бесправно изградените објекти на територијата на општината. Со тоа, овој процес на обезбедување вербални докази е сè уште во тек“, информираат од Обвинителството за овој случај
Основното јавно обвинителството (ОЈО) Скопје отвори предмет и постапува во врска со деловодна книга со архивски броеви за легализација на објекти во Општина Чаир, за која постои сомнеж дека е фалсификувана.
Од Обвинитлството информираат дека предметот за овој случај е оформен по допрен глас врз основа на медиумски натписи.
„По предметот се постапува и се преземаат дејствија на проверки, обезбедена е обемна писмена документација и тоа како од Општина Чаир, така и од Министерството за транспорт и врски на РСМ, од Државниот управен инспекторат, но и од Државниот инспекторат за градежништво и урбанизам“,
се вели во соопштението од Обвинителството.
Во текот на оваа предистражна постапка се испитуваат повеќе лица што даваат потребни известувања.
„Испитани се поголем број службени лица од Општината Чаир, како и дел од барателите на легализација на бесправно изградените објекти на територијата на општината. Со тоа, овој процес на обезбедување на вербални докази е сè уште во тек“,
информираат од Обвинителството.
По анализа на севкупниот материјален и вербален доказен материјал чие обезбедување во овој предмет е во финална фаза, како што посочуваат од Обвинителство, ќе следи донесување и на соодветна јавнообвинителска одлука.
ОЈО Скопје вчера поведе истражна постапка против управител на фирма за бесправна изградба на шесткатница на улицата „Ќемал Сејфула“ во Општина Чаир.
Градоначалничката Данела Арсовска изминатиот период во повеќе наврати се вклучи во живо со видеа на социјалната мрежа Фејсбук директно од Општина Чаир, покажувајќи градилишта и објекти за кои тврди дека се дивоградби.
На 31 мај таа до ОЈО Скопје ги поднесе доказите и документите во врска со дивоградбите во Чаир.
Претходно алармираше дека, според нејзини информации, во Општина Чаир активно се уништуваат докази за фалсификатите и дивоградбите.