Со обвинителниот предлог јавен обвинител до Кривичниот суд доставил и предлог за продолжување на претходно определената мерка притвор за обвинетиот
Поднесено е обвинение за лицето што на 2 мај ги запали викенд-куќата и станот на сопругата со која бил во бракоразводна постапка, информираа денеска од Основното јавно обвинителство Скопје.
Обвинетиот, додаваат од Обвинителството, најпрво на 1 мај телефонски ѝ се заканувал на оштетената и на нивниот заеднички син дека ќе им ги запали станот и куќата.
Еден ден подоцна ја реализирал заканата предизвикувајќи пожар со бензин пред влезните врати на двата објекта. Пожарот се проширил и во внатрешноста на куќата и на станот кој се наоѓал во зграда, па била предизвикана значителна опасност за животот на луѓето.
Со обвинителниот предлог, надлежниот јавен обвинител до Основниот кривичен суд Скопје доставил и предлог за продолжување на претходно определената мерка притвор за обвинетиот.
За случајот од Обвинителството информираа во саботата, кога беше побарано и да се определи мерката притвор.
Обвинетиот, како што тогаш пренесоа дел од медиумите е зет на покојниот водител Зоран Василевски, попознат како Зоки Фаци.