Тројцатa лекари се гонат за тешки дела против здравјето на луѓето. Обвинителството смета дека примениле неподобно средство и начин на лекување врз пациентката со што предизвикале влошување на нејзината здравствена состојба
Основното јавно обвинителство од Струга гони тројца лекари за кривичното дело – Тешки дела против здравјето на луѓето, по скандалот, кога при укажување на медицинска помош на родилка од Дебар ѝ отстранија матка, бубрег и јајник.
Обвинителството смета дека тројцата обвинети како лекар – специјалист гинеколог акушер, специјализант по гинекологија и акушерство и лекар – гинеколог акушер, сите вработени во Јавната здравствена установа – Медицински центар – Струга, при укажување лекарска помош примениле очигледно неподобно средство и начин на лекување врз пациентката со што предизвикале влошување на нејзината здравствена состојба.
„Родилката била примена на 27.08.2020 година заради породување на гинеколошкото одделение, бидејќи била во 40-тата недела од бременоста. Ја примил првообвинетиот кој ја водел како пациент во текот на целата бременост и донел одлука породувањето да биде извршено со царски рез. При операцијата му асистирал второобвинетиот, но при изведувањето на царскиот рез тие ја оштетиле левата бубрежна артерија. Како резултат на ова оштетување дошло до влошување на здравствената состојба на пациентката, која била нестабилна, но и покрај тоа обвинетите не презеле никакви мерки за утврдување на причините за влошување на нејзината состојба. Со терапијата која и ја дале дополнително ја влошиле состојбата на пациентката и задоцниле со реакцијата, поради што кај неа настанала огромна загуба на крв и западнала во состојба на шок“,
соопшти ОЈО.
Во такви услови, се вели во соопштението, првообвинетиот со асистенција на третообвинетата се решиле да извршат нов оперативен зафат за да го спречат крварењето, да и ја отстранат матката и левиот јајник иако на овие органи немало никакви промени или повреди. Откако и по затворањето на пациентката крварењето не престанало, тие се решиле за уште еден оперативен зафат при што хирурзите откриле дека крварењето доаѓа од оштетувањето на бубрежната артерија предизвикано при царскиот рез. Заради неможноста да се реконструира бубрежната артерија, таа морала да се подврзе и да се отстрани левиот бубрег со цел да се спаси животот на оштетената.
„Кога тоа било направено и крварењето било запрено, пациентката била препратена на лекување на Државната клиника ‘Мајка Тереза’ во Скопје“,
прецизира ОЈО.