Со измените на законите за основно и средно образование, кои вчера ги донесе Собранието, првпат во државата се овозможуваат исклучоци од редовниот воспитно-образовен процес, и тоа во случаи кога има кризна состојба, прогласена епидемија, пожари, поплави или други големи природни непогоди.
Како што велат од Министерството за образование и наука, исклучоците се прават во однос на започнувањето и завршувањето на учебната година, односно учебната година може да започне и да заврши во време различно од времето кога вообичаено започнува, за што ќе одлучува Владата.
„Во вонредни услови, со овие законски измени, наставата во основното и средното училиште ќе може да се организира со физичко присуство на учениците, или на далечина со примена на средства за електронска комуникација. Според измените на законите, организирањето на наставата со физичко присуство на учениците ќе биде можно само ако се исполнети критериумите и условите согласно протоколите и планот за одржување на наставата за основните и средните училишта, донесени од Владата“,
појаснуваат од МОН.
Измените на двата закона предвидуваат часот да трае пократко од 40 минути, заради поголема заштита на учениците кои ќе следат настава со физичко присуство, а предвидена е и можност за кратење на наставните денови од 180 на најмалку до 100.
Од МОН посочуваат дека законските измени биле подготвени врз основа на студии од меѓународни организации, како што се Светската здравствена организација (СЗО), Фондот за деца при Обединетите нации (УНИЦЕФ), Меѓународната фондација на Црвениот крст (ИФЦР) и истражувањата поврзани со ковид-19.
За успешен почеток на учебната година, усвоени се протоколите и планот според кои во тек се подготовките во основните и средните училишта за почеток на наставата од први октомври.