Мицкоски вели дека во неговиот мандат нема да се дозволи неказнивост за припадниците на државните служби
Премиерот Христијан Мицкоски денеска порача дека случајот со семејно насилство, во кој е инволвиран припадник на неговото пошироко обезбедување, е јасен доказ дека во државата веќе нема повластени и дека законите се применуваат подеднакво за сите.
Одговарајќи на новинарски прашања по поставувањето камен-темелник за доградба на училиштето „Гоце Делчев“ во Општина Аеродром, Мицкоски нагласи дека во неговиот мандат нема да се дозволи неказнивост за припадниците на државните служби.
„Ова е уште еден доказ дека законот важи подеднакво за сите, за разлика од минатото кога членови на обезбедување на претседателот тепаа граѓани, се изживуваа по дискотеки и минуваа неказнети. Во овој случај, при најмал престап, системот веднаш функционира. Јас не толерирам недисциплина“,
рече Мицкоски.
Тој појасни дека лицето е дел од претходницата која не ја гледа често, додавајќи дека сопругата на напаѓачот е ќерка на негов колега од факултет.
Според официјалниот билтен на МВР, припадникот на обезбедувањето (Р. Р.) веќе е отстранет од работното место.
Настанот се случил на 2 мај, околу 23 часот, кога неговата 37-годишна сопруга пријавила дека била физички нападната во семејниот дом, каде што ѝ биле упатувани и закани.
При нападот, на оштетената ѝ бил скршен и мобилниот телефон.